Qaýipsiz jaǵajaı – semeılik bapkerdiń tartýy

Bala ólimine beıjaı qaraı almady

Mundaı qadam jasaýǵa sport mamanyn jyl saıyn qaıtalanatyn ózen-kólderdegi adam ólimi májbúrledi. Aı­ta­lyq, qalalyq tótenshe jaǵdaılar bas­qar­masynyń málimeti boıynsha byltyr Semeı óńirinde 11 adam sýǵa batyp, qaza tapqan. Onyń úsheýi balalar. Mine, osyndaı qaıǵyly jaǵdaılardy eskergen grek-rım kúresiniń jattyqtyrýshysy «múldem tózbeýshilik» qaǵıdatyna sáı­kes aldyn alý sharalaryna kirisedi. Qor­da­lanǵan máseleni sheshýdiń amaly re­tinde adam ómirine qaýipsiz jaǵajaı salý týraly sheshimdi qabyldaıdy.

«Byltyr Ýfa qalasynda álem chempıonatynda júrgen kezimde áleýmettik jeliden Semeıde balanyń sýǵa batyp ketkeni týraly habardy oqyp qaldym. Ol meniń qyzymnyń synyptasy edi. Bul jaǵdaı júregime qatty batty. Sodan ózen-kólderdegi ólim-jitim kórsetkishine baılanysty resmı statıstıkany ashyp qarasam, Semeı óńiriniń birinshi orynda turǵanyn baıqadym».

Baıyppen emes, haıppen qaraǵandar boldy

«Álem chempıonatynan oralǵan boıda eseıip, erjetken oqýshylarymdy jınap, jaǵajaı salý týraly sheshim qabyldaǵanymdy aıttym. Barlyǵy muny qýana qabyldap, qoldaıtynyn jetkizdi. Álbette, bul ońaı sharýa emes. Jasyratyny joq, muny estigen adam­dardyń keıbiri máseleniń baıy­byna barmaı «bul kommersııalyq joba, jaǵajaı aqyly bolatyn shyǵar», dep túrli qanqý sózderdi tarata bas­tady. Birden aıtaıyn, bul aqysyz, tegin jaǵajaı bolady. Eń bastysy, biz­diń kózdegenimiz – óskeleń urpaqtyń qaýip­sizdigi», dedi E.Amarhanov.

Bastamashyl azamat qurylys jumys­taryna kirispes buryn Tótenshe jaǵ­daılar mınıstriniń atyna hat jazyp, tehnıka jaǵynan qamtamasyz etý jó­nin­de kómek surapty. Qýantarlyǵy, quzyrly organ bul ótinishti jaýapsyz qal­dyrmaǵan. Qazir jaǵajaı qurylysyna bólingen aýmaqta jumys qarqyndy júrip jatyr. Tótenshe jaǵdaılar bas­qar­masynyń qyzmetkerleri arnaıy tehnıkamen ózenniń túbin tegistep, qum, tas jáne basqa da materıaldardy ákelýge járdemdesip keledi.

Mınıstrlik qoldaý kórsetti

«Tótenshe jaǵdaı mınıstrine barynsha qoldaý kórsetip kele jatqanyna rızashylyǵymdy jetkizgim keledi. Mı­nıstrlik ótinishimizdi jerge qaldyrǵan joq. Qazir resmı qujattar rettelip ja­tyr. Qujattar daıyn bolǵan soń ony qalalyq turǵyn úı kommýnaldyq sharýa­shylyq basqarmasyna tapsyramyz. Olar osy jerdi kútip ustaý úshin atalǵan aý­maqty bizge jalǵa beredi. Qa­zir­diń ózinde jaǵajaıdyń qashan daıyn bolatyny týraly surap jatqan adam kóp. Bıyl jaǵajaıdyń bir jaǵy paıdalanýǵa beriledi. Igerilip jatqan jerdiń tutastaı aýmaǵy – 2,5 gektar. Bul aýmaqty tańdaýdaǵy sebebimiz, munda qatty aǵyn joq, ózen sýy móldir, taza. Sátin salsa, keleshekte osy jerden serýen­ge arnalǵan kemelermen (teplohod) saıahattaıtyndaı jaǵdaı qarastyrylady», dedi bapker.

Qoǵamdyq keńistik tıimdi uıymdastyrýdy kózdeıdi

E.Amarhanov aıtqandaı, aldaǵy ýaqytta bul aýmaqta tótenshe jaǵdaılar qyzmetkerleri men medısına mamandary qaýipsizdikti baqylaıtyn bolady. Buǵan tıisti oryndy qajetti zattarmen jaraqtaý kózdelgen. Sol sekildi qalalyq ákimdikke arnaıy baqylaý kameralarymen qamtamasyz etý týraly ótinish te jazylypty. Qalalyq ishki ister basqarmasyna da jaǵajaıdaǵy saq­tyq sharalaryn kúsheıtý úshin usynys aıtý josparlanǵan. Budan bólek, bu­qara­lyq sportty damytyp, qoǵam­dyq keńistikterdi tıimdi paıdalaný maq­sa­tynda atalǵan aýmaqta voleıbol, fýt­bol syndy oıyn alańdaryn salý qaras­tyrylyp otyr.

Joǵaryda aıtylǵandaı, bul jobany iskerý asyrý ońaı bolmaı tur. Nege deseńiz, qurylys jumystaryna jumyl­dyrylǵan tehnıkany qajetti janar­maımen qamtamasyz etý úshin kúnine kem degende 150 myńdaı teńge jumsalady. Al osy jaǵajaıdyń qury­­lysyna sport jat­tyq­tyrýshysy jeke kóligin satyp, nesıe alǵan. Sol sebepti jaǵarmaımen qamta­masyz etýge járdemdesetin jandar tabylsa, buǵan qýana kelisetinderin aıtady.

Balalardy kúrestiń álippesine baýlyp júrgen Erjannyń mundaı bastamanyń kóterýi tegin emes. Budan úsh jyl buryn ol Semeı-Novosibir baǵy­tyndaǵy otqa oranǵan avtobýstan 50-deı adamdy qutqaryp qalǵan bolatyn. Sonymen qosa pandemııa órshigen kezde semeılik bapker kórshiles memleketten dári-dármek tasyp, emge qajetti apparattardy ákelýge qolushyn sozǵan edi. Osyndaı ıgilikti ister úshin 2019 jyly «Qazaqstannyń 100 jańa esimi» jobasynyń jeńimpazy atanǵany da sodan.

Jalǵyz jaǵajaı jabyldy

Jýyrda Semeıge qarasty Ozerka aýylynyń mańyndaǵy jaǵajaıdyń jabylǵany týraly aqparat tara­dy. Bul shomylýǵa ruqsat etilgen jal­ǵyz oryn sanalatyn. Onyń ózinde atal­ǵan aýmaqqa adamdar aqsha tólep kiretin. Sebebi ol demalys bazasynyń aýmaǵynda ornalasqan. Al qalalyq tur­ǵyn úı-kommýnaldyq basqarmasynyń ınfraqurylymy qarastyrylǵan jaǵa­jaıdy salyp beremiz degenine on jylǵa sozylyp ketti. Bıyl taǵy da ýádeni tó­gý­den jalyqpaı «shomylýǵa arnalǵan oryndy ashamyz», dep sendirýge tyrysyp baqty. Belgili bolǵandaı, buǵan burynǵy jyljymaly kópirdiń mańy tańdalsa kerek. Bul úshin maýsymnyń sońynda memlekettik satyp alý konkýrsy jarııa­lanýǵa tıis edi. Alaıda semeılikterdiń buǵan shydamy taýsylyp, jergilikti entýzıastardyń bastamalaryna qoldaý kórsetýden basqa amaldary qalmady.  

P.S. Osy maqalanyń jazylýyna sebepker bolǵan azamat aıtqandaı, ol qoldaǵy bar qarajatyn zamanaýı ári qaýipsiz jaǵajaıdy salýǵa jumsaǵan. Ol búginge deıin eshkimge baryp qol jaıǵan emes jáne bulaı isteýge ary jibermeıdi. Mundaıda Erjan syndy áleýmettiń aldynda jaýapkershilikti sezetin azamatqa kásipkerler tarapynan qoldaý bolsa eken deısiń.

Abaı oblysy