– Jaýynovtar otbasynyń otanasy Qymbat Dalabaeva dúbirli dodaǵa 9 kelinimen qatysty. Aldymen olar, «16 qyz» ánimen ózderin tanystyrsa, kelesi kezeńde ózderi jasaǵan tekemetti kórsetti. Sodan soń balyq asyp, bıdaıdyń unyna daıyndalǵan qamyrdy qonaqtarǵa usyndy. Al kelesi óner kórsetý kezeńinde 9 kelin enesiniń baıanmen súıemeldeýimen halyq áni «Aqtamaqty» jandy daýysta oryndady. Sán kórsetý aınalymynda kelinder qyz uzatý saltyn sahnalady. Nátıjesinde, Jaýynovtar otbasy eń joǵary upaımen jeńiske jetti, deıdi ene men toǵyz kelindi atalǵan saıysqa daıyndaýshylardyń biri Mánet Shyraqbaı.
Jaýynovtar otbasy tálim-tárbıesimen, ónerimen, sheberlikterimen úlgili. Toǵyz ul munaı salasynda eńbek etedi, qazaqtyń salt-dástúrin saqtaǵan, ene jolyn qýǵan kelinderiniń biri sheber bolsa, biri – aspaz, biri – ánshi.
Otaǵasy Jolekesh Jaýynov pen Qymbat Dalabaeva 1964 jyly shańyraq qurǵan. Qymbat áje 11 qursaq kótergen, eki balasy jastaı shetinegen. Qymbat Dalabaıqyzy ómirden erte ketken qaıynaǵasy men abysynynan qalǵan 6 ul-qyzdy óziniń 9 balasyna qosyp baǵyp, 15 balanyń árqaısysyn jeke-jeke shańyraq qylǵan eken. Aýyl sharýashylyǵynda shopan, júrgizýshi bolyp qyzmet etip zeınetke shyqqan otaǵasy 2008 jyly dúnıeden ótti.
Búginde uldaryn uıaǵa qondyrǵan Qymbat áje – salt-dástúrdi nasıhattaýshy, qazaqtyń aǵash úıin dáripteýshi, on saýsaǵynan óneri tamǵan sheber, baıanmen jıyn-toıdyń sánin keltirgen ánshi, «Altyn alqa» ıegeri. Halyqtyq ataǵy bar «AINA» etnografııalyq-konserttik ujymynyń jáne Halyqtyq ataǵy bar «Asyl ájeler» ansambliniń múshesi. Qymbat áje 9 ulynan 37 nemere, 37 shóbere súıip otyr. О́z ortalaryna bedeldi, úlkenge izetti, kishige qurmetti el syılaǵan áýlet respýblıkalyq baıqaýda top jaryp, 350 myń teńge syıaqyny ıelenip qaıtty.
Mańǵystaý oblysy
