2022 jyldyń maýsym aıynyń qorytyndysy boıynsha sút baǵasy bir aıda 2,4%-ǵa, jyl basynan 17,2%-ǵa jáne bir jylda 21,5%-ǵa ósti delingen.
Salystyra ketsek, 2021 jyly baǵanyń jyldyq ósýi tek 9,5%-dy quraǵan.
«2022 jylǵy qańtar-mamyr aılarynda suıyq óńdelgen sút pen kilegeı óndirisi 235,3 myń tonnany qurady, bul bir jyl burynǵyǵa qaraǵanda 7%-ǵa az. Bul 6 jyldyq úzdiksiz ósýden keıingi uqsas kezeńdegi kórsetkishtiń alǵashqy tómendeýi», deıdi sarapshylar.
Sonymen qatar zertteýshiler sút pen kilegeı óndirisiniń jartysy tek Soltústik Qazaqstan (75,7 myń tonna) jáne Almaty (44,2 myń tonna) oblystaryna tıesili ekenin naqtylap otyr.
Sondaı-aq óndiristiń aıtarlyqtaı kólemi Aqmola (34,2 myń tonna) men Qostanaı oblysynda (28,5 myń tonna) baıqalyp otyr.
«Ishki naryqta ótkizý kólemi 3,7%-ǵa, 192 myń tonnaǵa deıin qysqardy, al eksport eki ese derlik, 5,6 myń tonnaǵa deıin tómendedi», delingen zertteýde.
Osy jyldyń birinshi toqsanynda shıki sútti tutyný jan basyna shaqqanda ortasha eseppen 3,5 lıtrdi qurady, bul 2021 jyldyń sáıkes kezeńimen salystyrǵanda 5%-ǵa az.
