Mysaly, «Altyn shańyraq uıasy» tigin ortalyǵynda qazirgi ýaqytta 13 kópbalaly ana jumys isteıdi. Ortalyq zattardan bastap úı toqymasyna deıin tigý, restavrasııalaý, konstrýksııalar, buıymdardyń barlyq túrin usynady. Karantın kezinde medısına qyzmetkerlerine maskalar men kostıýmder tigildi. Ortalyq dırektory Álıda Otarbaeva 2021 jyly «Bıznestiń jol kartasy-2025» bıznesti qoldaý men damytýdyń memlekettik baǵdarlamasy aıasynda grant aldy. Utyp alynǵan grantqa ortalyqqa qajetti qural-jabdyqtar satyp alyndy.
«Byltyr belgili qolóner sheberi Yrza Tursynzadanyń sheberlik sabaqtaryna qatystyq. Bizdiń ustazymyz sol kisi. Odan keıin «Altyn shańyraq uıasy» atty qoǵamdyq birlestikti qurdyq. Qala ákimdiginen kómek suraǵan edik, ótinishimiz keri qaıtarylǵan joq. Qazir munda 13 kópbalaly ana jumys isteıdi. Negizgi kásibimiz – tósek jabdyqtary, kórpe-jastyq sııaqty qyz jasaýyn tigý. Ártúrli ulttyq kıimderdi de tigemiz. Shıkizatty ortalyq bazardan satyp alamyz. Tapsyrystar kóp túsip jatyr», deıdi toǵyz balanyń anasy Álıda Otarbaeva.
Elordada byltyr áleýmettik osal toptarmen jumys isteıtin segiz ortalyq ashylǵan. Mundaı oryndar áýeli kópbalaly analar men erekshe qajettiliktegi jetkinshekterdi tárbıelep otyrǵan otbasylar úshin qajet. Janar Baımuhambetova – altyn qursaqty ana. 9 balany dúnıege ákelgen ol qazir osy ortalyqtaǵy tigin sehynda eńbek etedi.
«Tapqan tabysym bala-shaǵamdy asyraýǵa jetkilikti», deıdi kópbalaly áıel. Buryndary jumyssyz júrgen Jannany ózi sekildi analar osynda shaqyrǵan. Qazir «eki qolǵa bir kúrek» ustaǵan ol qyz jasaýy men túrli buıymdar tigýdi qolǵa alǵan.
«Eshqandaı jumystan qashpaımyz. Qandaı jumys bolsa, sony isteýge tyrysamyz. Bul jerdiń bizge bereri óte kóp. Nege deseńiz, bul jer altyn qursaqty analarymyz bas qosatyn jer. Sodan keıin biz bir-birimizge kómektese alamyz. Sózben bolsa da, ispen bolsa da. Qolymyzdan keletin qazaq qol ónerin joǵaltpaý kerek. Ekinshiden, Qazaqstanda otandyq ónimdi damytýymyz qajet», dedi J.Baımuhambetova.
Osyndaı eldiń bolashaǵyna eńbek etip kele jatqan ortalyqtardyń biri – Bilim All. Ortalyq Strong Mothers qory janynan ashylǵan. Bul jerde kópbalaly analar men muǵalimder eńbek sharty boıynsha halyqty jumyspen qamtý ortalyǵy arqyly eńbek etedi. Joba jetekshisi Raıgúl Serikbaeva 2021 jyly «Bıznestiń jol kartasy-2025» bıznesti qoldaý men damytýdyń memlekettik baǵdarlamasy aıasynda grant aldy. Osy qarajat ortalyqty damytýǵa jáne ortalyq úshin tehnıka men jabdyqtar satyp alýǵa baǵyttaldy.
«Kópbalaly, jalǵyzbasty, erekshe bala ósirip otyrǵan analar birigip Strong Mothers NS («Nur-Sultannyń myqty analary») atty qoǵamdyq qor ashtyq. Bizdiń qoǵamdyq qordyń basty maqsaty – halyqtyń áleýmettik osal toptaǵy balalardyń, múmkindigi shekteýli balalardyń áleýetin ashý, kópbalaly analar men erekshe balalardy tárbıelep otyrǵan áıelderdi qoldaý arqyly Qazaqstannyń damýyna járdemdesý. Osy qoǵamdyq qor arqyly az qamtylǵan otbasylarǵa, kópbalaly, jalǵyzbasty, erekshe bala ósirip otyrǵan analarǵa aqparattyq, qujattyq kómek berý, demeýshiler men seriktester kómegimen azyq-túlik sebetin taratyp berý, osy toptaǵy otbasylardyń balalaryn 50 paıyz jeńildikpen óz mekememizde oqytý. Áli de bizdiń atqarar sharýamyz kóp. Bárimiz birlese, birige otyryp balalarymyzdy kemel keleshekke jeteleıik», dedi ortalyq dırektory R.Serikbaeva.
Strong Mothers Ns qoǵamdyq qorynyń basshysy ári áleýmettik kásipker Raıgúl Serikbaevanyń aıtýynsha, ortalyqtar jelisin ashýǵa kópbalaly ana bolǵany ári óziniń tájirıbesi áser etken.
«Men aǵylshyn tiliniń ustazymyn jáne seriktesterim de muǵalim, sondyqtan biz birge Bilim All jobasyn ashýdy uıǵardyq. Men, ana retinde, balalarymdy oqytýda qıyndyqtarǵa tap boldym: bári qymbat jáne alys. Kópbalaly otbasylardan shyqqan balalardyń qoljetimdi qosymsha bilim alýyna múmkindigi joq. Mundaı balalarǵa kómektesý meniń armanym boldy. Halyqtyń áleýmettik osal toptaryna kópbalaly otbasylardan shyqqan balalar, múgedektigi bar jáne tolyq emes otbasylardan shyqqan balalar jatady. Maqsatym – solarǵa qolushyn sozý», dedi qoǵamdyq qor basshysy.
