Oljas Ábishev Bas prokýratýraǵa qarjy monıtorıngi agenttiginiń qyzmetkerlerine qatysty 4 shaǵym túsirgen.
Ol bul jaıynda búgin ótip jatqan burynǵy densaýlyq saqtaý mınıstri Eljan Birtanovqa qatysty sot otyrysynda aıtty. Bul iste Oljas Ábishev te aıyptalýshy retinde jaýap berip jatyr.
Onyń málimdeýinshe, atalǵan agenttik qyzmetkerleri oǵan jáne otbasyna qaýip tóndirgen.
Sondaı-aq, O. Ábishev prokýratýraǵa joldanǵan birneshe ótinishtiń áli kúnge deıin elenbeı, qaraýsyz qalǵanyn aıtyp otyr.
«2020 jyldyń tamyzynda qarjy monıtorıngi agenttiginiń qyzmetkeri maǵan birneshe ret moraldyq jáne fızıkalyq qysym kórsetti. Ol tergeý ızolıatoryna kelip, osy mekeme orynbasarynyń kabınetinde 3 saǵat boıy maǵan qysym jasady», dedi sotta Oljas Ábishev.
Odan bólek, eks vıse-mınıstrdiń aıtýynsha, agenttik qyzmetkeri 12 jylǵa bas bostandyǵynan aıyrý qaýpi tónip turǵanyn aıtyp qorqytqan. Eger aıypty quqyq qorǵaý organdarymen yntymaqtastyq tanytsa, oǵan jumsaq jaza bolatynyna ýáde bergen.
Sot barysynda sýdıa Ábishevten qysymnyń naqty qalaı jasalǵanyn surady.
О́z kezeginde aıyptalýshy bir tergeý ızolıatory kamerasynan ekinshisine jıi aýystyrǵanyn aıtyp, aýyr qylmys jasaǵan kúdiktilermen birge otyrǵyzǵanyn dálelge keltirdi.
«Qarjy monıtorıngi agenttigi men Bas prokýratýranyń maǵan taqqan aıybyn jedeldetý maqsatynda tósegimniń astyna esirtki tastaý, sim-karta salyp jiberý, ıaǵnı tyıym salynǵan zattardy tyqpalaýǵa talpynys jasaldy», dedi burynǵy densaýlyq saqtaý vıse-mınıstri.
Eske sala keteıik, burynǵy densaýlyq saqtaý vıse-mınıstri Oljas Ábishev 2020 jyly 2 tamyzda qamaýǵa alyndy.
Oǵan memlekettik bıýdjet qarajatyn jymqyrdy degen aıyp taǵyldy.
