Park dırektory Sergeı Bykovtyń aıtýynsha, qoqystyń kóbeıgeni demalýǵa kelgen adamdar sanynyń aıtarlyqtaı artqanymen baılanysty. Shilde aıynyń basynan «Býrabaı» MUTP» MM baqylaý-ótkizý beketterinen 58 278 týrıst pen 27 204 kólik ótken.
«Kólderdiń jaǵalaýynda jáne adam kóp jınalatyn jerlerde sanıtarlyq tazalaý jumysy kún saıyn júrgiziledi. Jumys kúni qoqys úsh ret (saǵat 6.00, 12.00, 19.00-de), demalys pen mereke kúnderi tórt ret shyǵarylady (saǵat 6.00, 12.00, 15.00, 19.00-de). Qajet kezde qoqysty jınaý men tasý jumystary úshin qosymsha resýrs tartylady.
«Býrabaı» ulttyq parki aýmaǵynda 60 metall konteıner qoıylǵan, onyń 30-y Býrabaı kóliniń jaǵalaýynyń mańynda bir-birinen 150 metr qashyq jerde ornalasqan. Oǵan qosa usaq qoqysqa arnalǵan 100 jáshik bar», dedi Sergeı Bykov.
«Býrabaı» kýrortynyń aýmaǵynda tazalyq pen tártipti qamtamasyz etetin mekemelerge keler bolsaq, bul jumysty Býrabaı aýdanynyń jerinde – osy aýdannyń ákimdigi, al ulttyq park aýmaǵynda – «Býrabaı» MUTP men «Býrabaı Damý» JShS júzege asyrady. Tabıǵı parktiń týrıstik aımaqtaryn jáne kópshilikke arnalǵan demalys oryndaryn abattandyrý birlesip atqarylady.
Aldyn-ala jasalǵan josparǵa sáıkes, osy maýsymda ulttyq parktiń rekreasııalyq júkteme kóp jerlerine qosymsha 100 jáshik pen 20 konteıner, Býrabaı kentiniń aýmaǵyna 16 konteıner men 30 jáshik qoıylady.
Sonymen qatar bıyl jaz maýsymynyń basynda Aqmola oblysynyń ákimdigi Býrabaı kýrortyna arnap qosymsha 16 sanıtarııalyq torap aldy. Onyń 11-i ulttyq park aýmaǵynda, qalǵan 5-eýi Býrabaı aýylynda ornatyldy. Qazir «Býrabaı» kýrortynda barlyǵy 31 qoǵamdyq sanıtarııalyq torap jumys istep tur.
Ulttyq park terrıtorııasynda, Býrabaı kóliniń 2,5 shaqyrymǵa sozylyp jatqan jaǵajaıynda kıim aýystyratyn 16 kabına bar. 1 tamyzǵa deıin «Býrabaı» MUTP aýmaǵyndaǵy qoǵamdyq jaǵajaılarǵa kıim aýystyratyn taǵy 5 kabına qoıylady.
2022 jyly Shýche-Býrabaı kýrorttyq aımaǵyna kelgen týrıster aǵyny kúrt ulǵaıǵanyn atap ótken jón. Bıylǵy 7 aıda kelýshiler sany 550 myń adamǵa jetti (2021 jylǵy kórsetkish – 300 myń). Jyl sońyna deıin týrıster sany 1 mıllıon bolady degen boljam jasalyp otyr.
