«Pııazdyń joǵary shyǵymdylyǵyna qaramastan, onyń ishki naryqtaǵy quny óte joǵary. Jyl basynan beri pııazdyń baǵasy 109%-ǵa ósti (eki eseden astam), bul sońǵy tórt jyldaǵy eń joǵary ósim. Sonymen qatar, onyń apta saıyn ortasha eseppen 2-3%-ǵa ósýi baıqalady», dedi mınıstrliktiń resmı ókili Álisher О́mirzaq.
Vedomstvonyń málimetinshe, qazir respýblıka boıynsha pııazdyń ortasha baǵasy 191 teńgeni quraıdy, bul rette Almaty oblysynda eń joǵary baǵa 308 teńge mólsherinde tirkeldi.
«Qazaqstandyq ishki naryqtaǵy pııazdyń joǵary quny kórshi naryqtaǵy suranystyń ósýimen jáne oǵan joǵary eksporttyq baǵalardyń belgilenýimen baılanysty, bul pııazdy Qazaqstan Respýblıkasynan tys jerlerge áketý kólemin arttyrdy», dep qosty Álisher О́mirzaq.
Onyń aıtýynsha, 20 shildede áleýmettik mańyzy bar azyq-túlik taýarlarynyń baǵalary máseleleri jónindegi keńeste pııazǵa baǵa belgileý máselesi qaraldy.
«Aýyl sharýashylyǵy mınıstrligine Ishki baǵany qalyptastyrý maqsatynda ishki naryqtyń osy ónimmen qamtamasyz etilýine taldaý júrgizý, óńirlerge pııaz jetkizý jáne kelisimshart jasaýdy uıymdastyrý, sondaı-aq syrtqy saýda qyzmeti máseleleri jónindegi vedomstvoaralyq komıssııaǵa pııaz áketýge tyıym salý nemese shekteý engizýdiń oryndylyǵy týraly másele shyǵarý tapsyryldy», dedi mınıstrlik ókili.
Bul rette, taýardy baqylaýsyz áketý faktilerin boldyrmaý maqsatynda fıtosanıtarııalyq ruqsat berýdi toqtata turý týraly sheshim VAK otyrysynda osy másele qaralǵanǵa deıin qabyldandy.
«22 shildede VAK otyrysynda jáne ÁMAT máseleleri jónindegi keńeste aǵymdaǵy kezeńde pııaz áketýge tyıym salýdy engizýdiń orynsyzdyǵy týraly ustanym aıtyldy, óıtkeni júrgizilgen taldaý Qazaqstannyń ishki naryǵynda pııaz tapshylyǵynyń paıda bolý qaýpi joq ekenin kórsetti jáne búgingi kúni óńirlerdiń pııazben qamtamasyz etilýi 34 myń tonnany quraıdy, bul aılyq tutynýdyń 132%-yn quraıdy. Osyǵan baılanysty fıtosanıtarııalyq ruqsattardy berý qaıta jańǵyrtylýy tıis», dedi Álisher О́mirzaq.
Budan basqa, 22 shildede VAK otyrysynan keıin óńirlermen selektorlyq keńes barysynda AShM-ge kvotalaý kezinde fıtosanıtarııalyq ruqsattar men lısenzııalaý arqyly ádil baǵalar boıynsha ishki naryqty qamtamasyz etý tetikterin ázirleý, sondaı-aq ulttyq qaýipsizdik komıtetiniń shekara qyzmetimen (kelisim boıynsha) birlesip, pııazdy fıtosanıtarııalyq ruqsattarsyz áketýge tyıym salý jónindegi zańnama talaptarynyń oryndalýyn qamtamasyz etý tapsyryldy.
«AShM-ge 15 qyrkúıekke deıin ÁMAT sanatyna jatatyn kókónis ónimderiniń ishki naryǵyn qamtamasyz etý táýekelderine taldaý júrgizý tapsyryldy. Búginde pııaz eksportyna tyıym joq», dep túıindedi mınıstrlik ókili.
Buǵan deıin Saýda mınıstrligi Qazaqstannyń keıbir aımaqtarynda pııazdyń baǵasy 360 teńgege deıin kóterilgenin habarlady. Osyǵan baılanysty VAK otyrysynda Aýyl sharýashylyǵy mınıstrligine Saýda komıtetimen jáne oblys ákimdikterimen birlesip baǵanyń ósý sebepterin anyqtaý tapsyrylǵan edi.
