Qaraly habardy M.Áýezov atyndaǵy akademııalyq drama teatr ujymy jetkizdi.
«Qazaq mádenıeti men óneri orny tolmas qazaǵa ushyrady. Ǵabıt Músirepov atyndaǵy qazaq memlekettik akademııalyq balalar men jasóspirimder teatrynyń aktrısasy, qazaq sahna óneriniń sańlaǵy, QR Halyq ártisi Roza Áshirbekova 85 jasqa qaraǵan shaǵynda ómirden ozdy. M.Áýezov atyndaǵy Qazaq ulttyq drama teatrynyń ujymy marqumnyń januıasyna, jaqyndary men kúlli qazaq eline qaıǵyra otyryp kóńil aıtady. Sizdiń jarqyn beıneńiz kóp kóńilinde uzaqqa saqtalary anyq, dep jazylǵan M.Áýezov atyndaǵy akademııalyq drama teatrynyń hatynda.
Roza Áshirbekova 60 jyldan asa ýaqyt Ǵ.Músirepov atyndaǵy Qazaq memlekettik akademııalyq balalar men jasóspirimder teatrynda eńbek etti. Aktrısanyń alǵashqy rolderiniń biri – B.Tájibaevtyń «Qaragóz qaryndasym» spektaklindegi Anna beınesi.
Teatr sahnasynda somdaǵan Lázzat (T.Ahtanovtyń «Mahabbat muńynda»), Hadısha, Seıde (Sh.Aıtmatovtyń «Armanym Áselimi» men «Betpe-betinde»), Shafaq (M.Kárimniń «Aı tutylǵan túninde»), Gertrýda (Ý.Shekspırdiń «Gamletinde»), Gıasınta (Molerdiń «Skapenniń aılasynda»), Arkadına (A.Chehovtyń «Shaǵalasynda»), Kleopatra Lvovna (A. Ostrovskııdiń «Adam alasy ishindesinde») rólderi Roza Áshirbekovanyń kásibı sheberligin tanytyp, qazaq sahna óneri tarıhyndaǵy shoqtyǵy bıik beınelerge aınaldy.
