Qudirettiń kúshi qandaı, aınalamyzda tumsa tabıǵat tunyp tur, biraq sony kóbimiz kóre bermeımiz. Bylaısha basyp, taptap ótip ketemiz. Al sýretshiniń mindeti sony toqtatyp, kózimizge kórsetý. Estý qabiletinen qaǵajý kórse de Sabına tabıǵattyń tylsym únin boıaýlar arqyly qabyldaıdy. Alýan janrda erkin qalam silteıtin onyń basty taqyryby – názik gúlder, orman-taýlar, aýyl adamdarynyń tynys-tirshiligi. Shyǵarmalarynyń sıýjetteri tabıǵatpen úılesim tapqan halqymyzdyń baqytty bolashaqqa degen senimin beıneleıdi. Sol arqyly izgi eńbekke, ult densaýlyǵyna, sulýlyq pen búkil álemde beıbitshilikke negizdelgen jalpy adamzattyq qundylyqtardy atap kórsetedi.
«Gúlder álemine tántimin, gúlderden shabyt alamyn. Irıs, sý lalagúli, aqjelken, qyzǵaldaq, túrli raýshandar, kók qońyraýlar meniń taýsylmaıtyn taqyrybym. Qazaq dalasynyń sulýlyǵy men baılyǵyn kenep arqyly kórsetý ónerdegi úlken mıssııam dep bilemin. Tiri tústerdiń alýan túrli, adamdardyń qımyl-qozǵalysy men ym-ısharasynyń ásemdigi, týǵan jerimizdiń ósimdikteri men faýnasy meni arman bıigine jeteleıdi, qanattandyrady», deıdi Sabına.
Sýretshi gúlderdiń aýqymyn ádeıi úlkeıtedi, japyraqshalardyń pishinin, móldir shyqty muqııat boıaıdy. Osylaısha, kórermenge gúlderdiń qurylymyn egjeı-tegjeı kórýge, olardyń aspanmen baılanysyn sezinýge múmkindik syılaıdy.
Sýretshi aýyl taqyrybyna jıi júginetinin aıttyq. Bul polotnolar qarapaıym turǵyndardyń kúndelikti kúıbeńge toly qalypty ómirin beıneleıdi. Taý men qyrattardyń tósine kıiz úıler tigilip, úı sharýasyndaǵy áıelder qazaqy aýyldyń kánigi tirshiligin kórsetedi. «Daladaǵy báseke» shyǵarmasynda gúl jaınaǵan jazyqta eki jigit at ústinde shaýyp keledi. Olardyń bolmysynan erkindiktiń, kúsh-qýattyń jáne baqytty jastyqtyń jigerli rýhy esedi. Almatydaǵy Kóktóbe munarasy, ǵasyr kýásine aınalǵan kári emender, únsizdikke toly eski baqtar, dámi tatqan jannyń tańdaıynda qalatyn aport almasy sýretshiniń basty «keıipkerlerine» aınalǵan.
Kıeli ónerdiń kóshin alǵa súıreý úshin jas talanttarymyzdy kópshilikke tanystyrýdyń jóni bólek. Almatyda beıneleý ónerin serik etken shyǵarmashyl jastardyń úlken ortasy bar. Búginde jas qylqalam sheberleriniń deni artyp, deńgeıi ósip keledi. Olardyń arasynda aıryqsha qoltańbasymen tanylǵan Sabına sekildi talanttar kóptegen respýblıkalyq, halyqaralyq kórmege qatysyp, túrli jobada tóbe kórsetip júr. Qala peızajdary men dala landshaftary, adam taǵdyry jaıly shaǵyn baıandaýlar Sabınanyń áleminde múlde bólek qyrynan kórinis tabady. Ashyq ta qanyq túster kóktem men kúzge ózgeshe reń beredi.
Sabınanyń sulý álemine siz de úńilip kórińiz.
ALMATY
