Úkimet «Atameken» UKP-men tyǵyz árekettestikte «Taza paraqtan bastap» retteýdi bızneske artyq ákimshilik júktemeni azaıtý jáne kásipkerlik qyzmetti júrgizýge neǵurlym qolaıly jaǵdaılar jasaý úshin engizip jatyr. Osy jumys aıasynda búginde retteýshi aktilerdiń barlyǵy qaıta qaralyp jatyr.
Keńeske qatysýshylar jer qatynastary, aqparat jáne baılanys, kompıýterlik baǵdarlamalaý, qubyrjol kóligi qyzmeti, qattaý jáne taý-ken ónerkásibi salalarynda taldaý júrgizý barysyn talqylady.
Premer-Mınıstr memlekettik organdardyń osy jumysty júrgizý kezinde úılestirýdi kúsheıtý qajettigin atap ótip, tıisti jospar-kestege taldaý júrgizilmegen salalardy engizýdi tapsyrdy.
«Bul Jańa Qazaqstannyń ekonomıkalyq saıasatynyń negizgi reformalarynyń jáne Úkimet jumysynyń negizgi baǵyttarynyń biri. Bızneske qoıylatyn talaptar túsinikti ári aıqyn bolýy kerek. Bıznes tynysh jumys isteýi tıis», dedi Álıhan Smaıylov.
Sonymen qatar keńeske qatysýshylar memlekettik baqylaý júıesin avtomattandyrý barysyn qarastyrdy.
Máselen, qazirgi ýaqytta SDIAО́M salalyq aqparat júıeleriniń bar-joǵyn tekserip, 57 qyzmet túrine taldaý jasap, memlekettik baqylaý salalaryn reınjınırıngten ótkizý boıynsha uıymdastyrý-rásimdik is-sharalar kestesin ázirleýde.
Úkimet basshysy avtomattandyrýdyń arqasynda tekserýshiler tek eleýli buzýshylyqtarǵa jol beretin kásipkerlik sýbektilerine ǵana tekserispen barýy qajet ekenin aıtty.
«Bızneske qoıylatyn negizsiz, qajetsiz, ózekti emes talaptardy qysqartý óte mańyzdy. Biz qazir jańa jaǵdaıda ómir súrip jatyrmyz, sondyqtan bıznesti tekserýge moratorıı kúshin joıǵan kezde memlekettik baqylaý jáne qadaǵalaý júıesi ádil jáne obektıvti bolýy kerek», dedi Álıhan Smaıylov.
Premer-Mınıstr eger baqylaý avtomattandyrylmasa, qandaı da bir tıimdilik týraly sóz qozǵaý orynsyz ekenin atap ótti.
«Osy maqsatqa qol jetkizý memlekettik organdarǵa – árbir sektor boıynsha árbir mınıstrge, árbir vıse-mınıstrge tikeleı baılanysty. Qoǵam ózgeristi sezinýi úshin bul jumysty adal atqarý kerek. Áıtpese, men kadr máselesin qaıta qaraıtyn bolamyn», dep túıindedi ol.
