Ishki ister mınıstrliginiń ókili Shuǵyla Turlybektiń aıtýynsha, ınternet-alaıaqtyqqa qarsy birlesken jumysty talqylaý maqsatynda mınıstrlikte arnaıy otyrys ótti.
«Jıynǵa Qazaqstan Respýblıkasynyń Sıfrlyq damý, ınnovasııalar jáne aeroǵarysh ónerkásibi mınıstrliginiń ókilderi qatysty. Sondaı-aq baılanys operatorlarynyń basshylary men jaýapty mamandary kezdesýge onlaın rejımde qosyldy. Keńeste sońǵy alty jylda ınternet-alaıaqtyq faktileriniń sany aıtarlyqtaı artqany atap ótildi», dedi Shuǵyla Turlybek vedomstvonyń onlaın brıfıngisinde.
2016 jyly osyndaı myń qylmys tirkelse, 2021 jyly alaıaqtyq sany 21 myńǵa deıin ósken. Jyl basynan beri 11 763 oqıǵa tirkelip, alaıaqtardyń kesirinen 7 mlrd teńge shyǵyn keltirildi. 571 qylmysker, 17 uıymdasqan qylmystyq top ustaldy.
«Buǵan deıin mınıstrliktiń bastamasy boıynsha onlaın-qaryz alý kezinde klıentterdi sáıkestendirýdiń banktik rásimderi qatańdatyldy. Qazirgi kezde alaıaqtar abonenttik nómirlerdi aýystyrý boıynsha servısterdi, telefondarǵa qashyqtan qol jetkizý úshin arnaıy qosymshalardy paıdalanady. Sondaı-aq olardyń arasynda shetelden áreket etetinder de bar. Jalpy, aýystyrý nómirlerin buǵattaý júıesi telefondyq alaıaqtyq faktilerin azaıtýy kerek. Búginde ony qazaqstandyq baılanys operatorlary belsendi túrde ıntegrasııalap jatyr», dedi Shuǵyla Turlybek.
