Álıhan Smaıylovtyń aıtýynsha, osy aralyqta JIО́ ósimi 3,2 paıyzdy qurady. Taýarlar óndirisi 3,3 paıyzǵa, kórsetilgen qyzmetter 2,4 paıyzǵa artty. Qurylys, saýda, óńdeý ónerkásibi, sondaı-aq kólik jáne baılanys salalarynda aıtarlyqtaı ósim bar.
Premer-Mınıstr Prezıdentke Úkimettiń áleýmettik mańyzy bar azyq-túlik taýarlaryna baǵany tejeý sharalaryna qatysty málimet berdi. Úkimet 2022-2024 jyldarǵa arnalǵan azyq-túlik qaýipsizdigi josparyn oryndap keledi.
Sondaı-aq Premer-Mınıstr ınflıasııa deńgeıin tómendetý, ekonomıkany demonopolızasııalaý, eldiń tranzıttik-kóliktik áleýetin damytý jónindegi sharalar týraly baıandady. Álıhan Smaıylov quny 22,2 trıllıon teńge bolatyn ınvestısııalyq jobalardyń júzege asyrylyp jatqanyn jetkizdi.
Úkimet basshysy Prezıdentke Qazaqstannyń 2023-2025 jyldarǵa arnalǵan áleýmettik-ekonomıkalyq damý boljamyn usyndy.
Prezıdent qurylymdyq reformalar men ekonomıkany demonopolızasııalaýdy jalǵastyryp, kásipkerlikke qoldaý kórsetý qajet ekenin aıtty. Sondaı-aq halyqtyń kirisin arttyrýdy qamtamasyz etýdiń mańyzdylyǵyn atap ótti.
