Petropavl turǵyndary qanttyń baǵasy 800-900 teńgege deıin jetkenine shaǵymdanyp otyr. Oblys ákimdigi qanttyń baǵasy 500 teńgeden aspaıtynyn málimdedi. Halyq ony birden áleýmettik baǵa dep atady. Qazir halyqtyń dúrligýi azdap basyldy, alaıda tek kommersııalyq baǵadaǵy qantty ǵana shekteýsiz mólsherde satyp alýǵa bolady.
Ulttyq statıstıka bıýrosynyń aqparaty boıynsha, bir jyl ishinde óńirde tek qant qana qymbattamaǵan. Unnyń baǵasy da 40%-dan astam ósti. Jarma, toqash jáne kondıterlik ónimder, makaron, jemister úshten birge qymbattaǵan. Sút ónimderiniń baǵasy 20%-ǵa, kókónister 24%-ǵa ósken. Jalpy azyq-túlik taýarlary toby boıynsha baǵanyń ósýi 20%-dy qurady.
Azyq-túlik emes taýarlardyń baǵasy 14%-ǵa, aqyly qyzmetter 8%-ǵa artqan. Jýý jáne tazalaý quraldary, qurylys materıaldary, kıim-keshek pen aıaq kıim, farmasevtıkalyq ónimder, turmystyq tehnıkalardyń barlyǵy qymbattaǵan.
Sondaı-aq meıramhana men sulýlyq salonynyń qyzmetteri ortasha eseppen 20%-ǵa ósken. Jaldamaly baspana 16 paıyzǵa qymbattaǵan.
