Nursultan Nazarbaev: «Ásker árdaıym saqadaı saı bolýy kerek»

ASTANA. 7 mamyr. Memleket basshysy barsha qazaqstandyqtardy patrıottyq, erlik pen jaýyngerlik dańq merekesimen quttyqtady. Bul týraly akorda. kz habarlady. Áskerı sherýdi Qorǵanys mınıstri Serik Ahmetovten saltanatty jaǵdaıda qabyldap alǵannan keıin Nursultan Nazarbaev: «Táýelsizdik jyldary memleketimiz kásibı armııa qalyptastyrdy, el múddesine tolyq saı keletin áskerı doktrına túzildi. Bizdiń qasıetti topyraǵymyz áýede de, jerde de jáne sýda da qorǵanys aıasynda. Biz barlyq kórshiles eldermen dostyq qarym-qatynastamyz. Qazirgi ýaqytta armııa árdaıym saqadaı saı bolýǵa tıis. Bul – áskerı qyzmetshiler aldyna memleket qoıyp otyrǵan mindet», – dedi. Budan soń Memleket basshysy jańadan  qabyldanǵan «Qazaqstan-2050» strategııasynyń el damýyndaǵy mańyzdy róline de toqtal kelip: «Bizdiń turaqty ekonomıkamyz, birtutas qoǵamymyz, daıyndyqtan ótken qýatty armııamyz bar. Biz jańa Qazaqstan rýhyna, progress jáne jasampaz bolashaq qalyptastyrý rýhyna adalmyz. Bul – elimizdi álemdegi eń damyǵan 30 memlekettiń qatarynan kórýdi armandaıtyn barsha qazaqstandyqtardyń maqsaty. Búkil óńirlerimiz, qalalarymyz, aýdandarymyz ben aýyldarymyz bir qarqynmen damyp keledi. Bizdiń basty baılyǵymyz – tatýlyq pen kelisim. Eldiń árbir azamatynyń boryshy – halqymyzdyń birligin saqtap, ony qorǵaý», – dedi. Joldybaı Bazar. Derekkóz: akorda. kz. Foto: «QazAqparat».