Aımaq ákimi Memleket basshysyna Almaty oblysynyń áleýmettik-ekonomıkalyq damýynda oń dınamıka bar ekenin aıtyp, strategııalyq damý jobasy týraly baıandady. Damýdyń negizgi 5 baǵytynan turatyn qujat 2 kezeńdi qamtıdy: 2025 jylǵa deıin jáne 2030 jylǵa deıin júzege asyrylmaq. Almaty oblysynda taıaý ýaqytta ınvestısııanyń ósimin 455 mıllıard teńgeden 686,5 mıllıard teńgege deıin arttyrý josparlanǵan. Osy maqsatta quny 618 mıllıard teńge bolatyn ári 7 myńnan astam jumys ornyn ashýǵa múmkindik beretin 132 jobadan turatyn ınvestportfel jasaqtalǵan.
Oblys ákiminiń aıtýynsha, Almaty aglomerasııasynyń aımaqaralyq josparyna sáıkes, oblystaǵy obektiler ınjenerlik jáne áleýmettik ınfraqurylymmen qamtamasyz etiledi. Sondaı-aq aımaqtaǵy eń ózekti problemanyń biri – úsh aýysymdy mektepter máselesi qalaı sheshiletindigi aıtyldy. 2025 jylǵa deıin «Jaıly mektep» jobasymen 51 mektep salý josparlanǵan. Sebebi oblysta úsh aýysymdy mektepter kóp. Sonymen qatar oblys jetekshi joǵary oqý oryndary men kolledjderdiń fılıaldary, daryndy balalarǵa arnalǵan mektep lıseı, «G 4 City» aýmaǵynda medısınalyq haby men ǵylymı-bilim berý aımaǵy bar «Gate District» ashylady, «Bilimdi ult» ulttyq jobasynyń aıasynda 11 kolledjdiń materıaldyq-tehnıkalyq bazasy nyǵaıtylady.
Prezıdentke usynylǵan málimetterge sáıkes, óńirde 38 medısına nysany salynady. Oǵan qosa, oblys ortalyǵynda 500 oryndyq kópsalaly aýrýhana qurylysy jobalanǵan.
Oblys ekonomıkasyn damytýdyń negizin qaıta óńdeý sektory, agroónerkásiptik keshen, kólik, logıstıka jáne týrızm quramaq. О́ńir basshysynyń aıtýynsha, qazirdiń ózinde oblysta 2626 jumys ornyn ashýǵa múmkindik beretin quny 290 mıllıard teńgelik 23 joba iske asyrylyp jatyr. Agroónerkásip kesheni salasynda 3330 jumys ornyn ashýǵa múmkindik beretin quny 210 mıllıard teńge bolatyn 78 joba júzege asyrylyp keledi. AО́K jobalary oblystyń barlyq aýdanynda qolǵa alynǵan. Marat Sultanǵazıevtiń aıtýynsha, týrızm salasynda jetistikter bar. Almaty oblysynda ornalasqan ulttyq parkterge keletinder sany kóbeıgen.
Qasym-Jomart Toqaev kezdesý sońynda oblys damýynyń strategııalyq josparyn tıisti memlekettik organdarmen birlesip júzege asyrýdy tapsyrdy.
