«Aýdandarymyzdyń, eldi mekenderimizdiń turǵyndarymen turaqty kezdesý ótkizemiz. Sonymen, Ońtústik-Shyǵys eldi mekeniniń turǵyndarymen bas qostyq. Aldyńǵy kezdesýde qala turǵyndary birqatar máseleni qozǵaǵan bolatyn. Qazir olardyń basym bóligi sheshildi, al júıeli máseleler boıynsha tıisti jumystar júrip jatyr. Bul kezdesýde kóterilgen problemalar osy jyldyń da, 2023 jyldyń da josparyna engizildi.
Qala turǵyndary úılerdi odan ári gazǵa qosý, abattandyrý, naqtyraq aıtqanda, abattandyrylǵan aýlalar men qoǵamdyq keńistikter sanyn arttyrý, káriz, jol salý, jaryqtandyrý sekildi túrli problemalar boıynsha júgindi.
Máselen osyǵan deıin aıtylǵan máseleler boıynsha: ınjenerlik jeliler qurylysyn jobalaýdy júrgizemiz – 30 km sýmen jabdyqtaý jelisi, 15 km turmystyq káriz jelisi, 23 km nóser kárizi jelisi. Sol sııaqty birneshe kósheniń joly salyndy, mysalǵa Qozybasy, Býrabaı, Aqarys, Ertis, Jaıyq, Edil, Degeris jáne taǵy basqa», dep jazdy ákim.
Onyń aıtýynsha, Ońtústik-Shyǵys eldi mekeni tolyqtaı gazben qamtamasyz etildi. Osy úshin 160 km-den astam gaz taratý jelisi salyndy. 1600-den astam abonent gazǵa qosyldy, taǵy 1900 abonent tehnıkalyq shart aldy. Gazǵa qosylý úshin muqtaj jandarǵa kórsetiletin áleýmettik kómek mólsherin 410 myń teńgege deıin ulǵaıtyp, qajetti qujattar tizbesi eki ese qysqartyldy. Bul sharanyń bári gazǵa qosylǵan úılerdiń sanyn kóbeıtýge múmkindik beredi, sol sııaqty qala ekologııasyna, qala turǵyndarynyń ómir súrý sapasyna oń áser etedi.
«Eldi mekende 50-den astam kamera, 2 myńnan asa jaryqdıodty sham (jyl sońyna deıin taǵy 500 sham ornatýdy josparlap otyrmyz) ornatyldy, 3 qoǵamdyq keńistik abattandyryldy, sondaı-aq kelesi jyly qoǵamdyq keńistikterge arnalǵan taǵy 13 ýchaske josparlandy. Eldi mekenderdi júıeli abattandyrý isi Memleket basshysynyń tikeleı baqylaýynda», dedi Altaı Kólginov.
