«Astana – jańa qala» arnaıy ekonomıkalyq aımaǵynda shatyr jáne qaptaý materıaldaryn shyǵaratyn zaýyttyń qurylys alańyna kapsýla salyndy. Jańa kásiporyndy «Samuryq-Qazyna Konstrakshn» kompanııasy salyp jatyr.
«Zaýyt ónimderi tek ishki naryqqa ǵana emes, kórshi elderge de eksporttalady. Sondaı-aq shatyr jáne qaptaý materıaldary buryn daıyn kúıinde Reseıden, Qytaıdan jáne Fınlıandııadan ákelingen», dedi Basqarma tóraǵasy Máýlen Aımanbetov.
Zaýyttyń óndiristik qýaty jylyna 630 000 metall jabyn elementteri men 2 200 000 jabyn materıaldaryn shyǵarady dep josparlanyp otyr.
О́ndiris iske qosylsa, 70-ke jýyq jumys orny ashylady. Qurylys prosesine 90-nan astam adam tartylady. Zaýyttaǵy alǵashqy ónim 2023 jyldyń qyrkúıeginde shyǵarylady dep josparlanýda .
