Eraly Toǵjanovtyń aıtýynsha, otandyq ǵylymdy damytýdyń negizgi basymdyǵy - ǵalymdardy júıeli qoldaý. Osyǵan baılanysty ol ǵylymı qyzmetke beıimdiligi bar balalardy irikteýdiń úzdiksiz kóp deńgeıli júıesin ázirleýdi tapsyrdy.
Aıta ketsek, sońǵy jyldary atalǵan júıe óner salasynda sátti qoldanylyp keledi. Bolashaq rejısserler men mýzykanttar orta mektepten bastap oqytylady jáne mamandandyrylǵan kolledjder men ýnıversıtetterde bilimin ári qaraı jalǵastyrady.
«Zertteý júrgizip, úlken jańalyq ashýǵa áleýeti bar ǵalymdardyń jańa býynyn qalyptastyrý úshin talanttardy tartý baǵdarlamasyn ázirleýdi tapsyramyn. Sondaı-aq shetelden tartylatyn daryndy qazaqstandyq ǵalymdar tiziliminiń aqparattyq bazasyn qurýdy jedeldetý qajet», dedi Premer-Mınıstrdiń orynbasary forým barysynda.
Bul rette Qazaqstanda ǵylymı kadrlar jetispeıtinin aıta ketken jón. Eger Táýelsizdik jyldarynyń basynda elde shamamen 52 myń ǵylymı qyzmetker bolsa, qazir barlyǵy 22 myń adam ǴZI men JOO bazasynda jumys isteıdi.
