1960 jyly qazaq jazýshysy Muhtar Áýezov KSRO-daǵy birneshe áriptesimen birge AQSh Memlekettik departamentiniń shaqyrýymen Amerıkaǵa saparlaǵan. Jazýshy Qurama Shtattarda bir aı boıy aralap, sol sapary týraly «Amerıka áserleri» atty sapar esteligin jazǵan, biraq jazýshy tutqıyl qaıtys bolyp, kitap aıaqtalmaı qalady.
Almatydaǵy AQSh Bas konsýly Kerolaın Sevıdj: «60 jyl buryn AQSh pen Keńes Odaǵy eki el arasynda mádenı baılanys ornasa, ózara qarym-qatynas ta jaqsara túser degen kelisimge keledi. Dál sol jylymyq kezinde mádenı tájirıbe almasý úshin uıymdastyrǵan alǵashqy saparǵa Muhtar Áýezov top jaryp, alǵashqylardyń biri bolyp barǵan eken. Eki elimiz seriktes bolýǵa alǵash qadamyn basqan kezde álemniń uly sýaıryǵynda tur edi. Biraq Áýezov bizdi jaqyndatatyn ortaq qundylyqtardy taba bildi. Jańa túsken búrshikteı shaǵyn ǵana mádenı tájirıbeden bastalǵan bul sapar osy kúni eki el arasynda otyz jyldan astam tarıhy bar myzǵymaıtyn yntymaqtastyqqa aınalyp otyr. Osy tarıhtyń bastaýyn Muhtar Áýezovtiń birinshi bolyp jazyp ketkeni de beker emes bolar», dep atap ótti.
Jazýshynyń «Amerıka áserlerin» aǵylshyn tiline aýdarǵan Dennıs Kınniń eńbegi kóp. Onyń aıtýynsha, ol Áýezovtiń Amerıkaǵa sapary týraly amerıkalyq gazet betterindegi maqalalarǵa kópten beri nazar aýdaryp kelgen. «Saparynan oralǵannan keıin Áýezov kópshilikke beımálim «Amerıka áserleri» degen joljazbalaryn jazady. Áýezovtiń bul ocherki orys tiline de, álemniń basqa tilderine de aýdarylmaı qalady. Men Áýezov ortalyǵynyń basshysy Dıar Asqaruly Qonaevpen kezdesip, bul týyndynyń tarıhı mańyzy týraly sóılesip, aǵylshyn tiline aýdarsaq tamasha bolar edi dep kelistik. Baǵymyzǵa oraı, AQSh konsýldyǵy bul ıdeıamyzdy qoldap, Áýezov kitabynyń arnaıy shyǵarylymyn búgin kópshilik nazaryna usynyp otyrmyz», deıdi aýdarmashy D.Kın.
Kitaptyń tusaýkeserine Áýezov murajaı-úıi men Áýezov ortalyǵyn basqaratyn Dıar Asqaruly Qonaev ta qatysty. Ol murajaıda Muhtar Áýezovtiń Uly Kanonda túsken sýreti áli de ilýli turǵanyn sóz etti. «Áýezov úshin Amerıkaǵa saparynyń orny bólek bolatyn. О́kinishke qaraı, jazýshy sol saparynan alǵan áserlerin aıaqtap úlgermeı, ómirden ótti», dedi D.Asqaruly.
Aıtalyq, «Amerıka áserleriniń» qazaq jáne aǵylshyn tilindegi alǵashqy tırajy ázirge satylymǵa túsken joq. Biraq jazýshynyń 125 jyldyq mereıtoıyna oraı Kitap.kz mobıldi qosymshasynan qyrkúıek aıynyń aıaǵyna deıin tegin oqýǵa bolady. Sondaı-aq Áýezov murajaı-úıiniń kelýshilerine tegin taratylady dep josparlanyp otyr.
