Mundaı jaman ádetten Almaty oblysynyń jas turǵyndary da ada emes eken. Derekke júginsek, jyl basynan beri kámeletke tolmaǵandardyń qatysýmen jasalǵan qylmys sany 64-ke jetipti. Byltyr mundaı 46 oqıǵa tirkelgen eken. Iаǵnı tártipsizdik pen tentektik úlesi artqan. Osy qylmystarǵa taldaý jasaǵan quqyq qorǵaýshylar bıyl Qarasaı aýdanynda tártip buzý deregi kóbeıgenin aıtady, ótken alty aıda 29 oqıǵa tirkelgen. Al Jambylda – 13 oqıǵa, Talǵar aýdanynda – 9 jaǵdaı jáne Eńbekshiqazaq aýdanynda 8 derek anyqtalypty.
Taǵy bir qaraly habardy da jasyryp qalýǵa bolmas. Aımaqta ótken alty aıda 7 bala óz-ózine qol jumsap, ómirmen qoshtasqan kórinedi. Qyrshynnan qıylǵan jeti jas ǵumyrdyń ekeýi Eńbekshiqazaq aýdanynda, ekeýi Uıǵyr aýdanynda turǵan bolsa, Jambyl, Ile jáne Qarasaı aýdandarynda bir-bir oqıǵadan tirkelgen eken. Al ózine qol salýǵa oqtalǵan 11 bala qutqarylypty.
О́kinishke qaraı, jol apatynan zardap shekken bala sany da artyp otyr. Jyl basynan beri jasóspirimderdiń qatysýymen 207 jol apaty bolyp,
9 bala qaza bolǵan. Taǵy 300 bala ártúrli dene jaraqatyn aldy.
– Balalar jolda júrý erejesin siz ben bizden úırenedi. Balalar úlkenderdiń júris-turysynyń jaqsy jaǵyn da, jaman jaǵyn da qabyldaıdy. Kóp jaǵdaıda balalar jolda jaraqat alyp, túrli jaǵdaıǵa ushyrap jatatyny kólik júrgizýshileriniń ǵana kinásinen emes, ol kóbinese balalardyń jol júrý erejesin bilmegendiginen de bolady. Balalarǵa jolda júrý erejelerin úıretip, únemi oǵan úlgi kórsetip jáne júris-turysyn qadaǵalap, balalardy kóshede bolatyn qaýipti jaǵdaılardan saqtandyrý árbir ata-ananyń mindeti, – deıdi Almaty oblystyq ákimshilik polısııa basqarmasynyń bastyǵy Nurlan Ysqaqov.
Almaty oblysy
