Kezdesý barysynda mádenıet jáne óner salasyndaǵy joǵary bilim berý uıymdarynyń oqytýshylaryna laýazymdyq eńbekaqyǵa koeffısıent eki esege artqany habarlandy. Eńbekke aqy tóleýdiń jańa erejeleri tórt shyǵarmashylyq joǵary oqý ornyna qoldanylady, olar: Temirbek Júrgenov atyndaǵy Qazaq ulttyq óner akademııasy, Qurmanǵazy atyndaǵy Qazaq ulttyq konservatorııasy, Qazaq ulttyq óner ýnıversıteti, Qazaq ulttyq horeografııa akademııasy.
Ortalyq kommýnıkasııalar qyzmetiniń alańynda QR MSM Mádenıet komıtetiniń tóraǵasy Roza Káribjanova, sondaı-aq shyǵarmashylyq joǵary oqý oryndarynyń rektorlary engizilgen ózgerister men jańa oqý jylyna daıyndyq barysy jaıly aıtyp berdi.
«Búginde mınıstrlik mádenıet jáne óner salasyna qajet kadrlardy daıarlaý boıynsha aýqymdy jumys atqarýda. Bolashaq kadrlardy daıarlaýdy Qazaqstannyń eńbek sińirgen jáne halyq ártisteri, shyǵarmashylyq ıntellıgensııanyń kórnekti ókilderi júzege asyrady. Sonymen qatar stýdentter elimizdiń úzdik mádenıet uıymdarynda tájirıbeden ótýge múmkindik alady. Oqý oryndarynyń zamanǵa saı ıntegrasııalanýynyń arqasynda elimizdiń mádenı landshaftyna básekege qabiletti jáne suranysqa ıe mamandar qosylatynyn senimmen aıta alamyz. Al eńbekaqyǵa qatysty aıtsaq, oqytýshylarymyzǵa laýazymdyq eńbekaqyǵa koeffısıenttiń 1.75-ten 3.5-ke deıin artýyn eskere otyryp, qaıta esepteý júrgiziledi», dedi Roza Káribjanova.
Máselen, professordyń eńbekaqysy 267 754 teńgeden 435 373 teńgege deıin ósti, al JOO dosenti 243 451 teńge emes, 395 855 teńge alatyn bolady.
Roza Káribjanovanyń aıtýynsha, Mádenıet mınıstrligine qarasty barlyq bilim berý uıymdary jańa oqý jylynyń bastalýyna daıyn.
Qazaq ulttyq óner ýnıversıtetiniń rektory Aıman Musaqojaeva shyǵarmashylyq joǵary oqý oryndary elimizdiń qazirgi jáne bolashaq mádenıetin damytý úrdisterin qalyptastyratyn ǵylymı, shyǵarmashylyq jáne aǵartýshylyq qyzmet ortalyqtary retinde jumys isteıtinin habarlady.
Jıynǵa Júrgenov atyndaǵy Qazaq ulttyq óner akademııasynyń rektory Azamat Satybaldy men Qurmanǵazy atyndaǵy Qazaq ulttyq konservatorııasynyń rektory Arman Júdebaev qatysty.
Aıta ketsek, jańa oqý jylynda memlekettik bilim berý tapsyrysyn iske asyrýǵa Mınıstrlikke baǵynysty bilim berý uıymdaryna 2 365 bilim granty bólindi. Atap aıtqanda: bakalavrıat úshin – 890 grant, magıstratýra úshin – 152 grant, doktorantýra úshin – 23 grant, joǵary oqý oryndary janyndaǵy kolledjderge – 200 grant, kolledjderge – 300 grant. Sonymen qatar halyqaralyq týrızm jáne qonaqjaılylyq ýnıversıtetiniń bakalavrıatyna 800 oryn bólingen.
