Jasyl jelekti aqqaıyńdar, kózdiń jaýyn alatyn tolyqsyǵan egis dalasy men jaınaǵan kók shalǵynǵa oranǵan keń dalada elimizdiń barlyq óńirinen kelgen 200-den artyq mal ósirýshiler, mal sharýashylyǵy mamandary, ǵalymdar Taıynsha, Aqqaıyń, Qyzyljar aýdandarynyń úzdik sharýashylyqtarynyń mal ósirý tájirıbelerimen tanysty. Sonyń ishinde «BIOOPERATION» JShS, «Emc-agro» JShS, «Severnyı broıler» JShS, «Qyzyljar-Sút», «Ivan Zenchenko», «Daıyndyq», «Ekpin» agro sharýashylyqtarynyń asyl tuqymdy maly men jabdyqtaryn, veterınarlyq quraldaryn, jem-azyq daıyndaý ádisterin kórip, tájirıbe almasty. Meımandardy, ásirese soltústiktiń asyl tuqymdy iri qarasy, jylqysy, qoı-eshkisi qyzyqtyrdy. Jem-azyqqa qosylatyn qospalar, ony daıyndaıtyn tehnıkalar men veterınarlyq preparattar arnaıy kórme arqyly kórsetilip, árqaısysynyń tehnıkalyq sıpattamalary tanystyryldy.
Tanystyrylymdar aıaqtalǵan soń Chapaı aýylynda mınıstr Erbol Qarashókeev, oblys ákimi Qumar Aqsaqalov jáne óńirlerdiń aýyl sharýashylyǵy basqarmalarynyń basshylary men mamandary qatysqan respýblıkalyq semınar boldy. E.Qarashókeev aldymen Soltústik Qazaqstan basshylyǵyna mal ósirýshi sharýalar úshin paıdaly is-sharany ótkizýge bastamashy bolǵany úshin rızashylyǵyn jetkizdi.
«Búgingi tańda mal ósirý elimizdegi turaqty túrde damyp kele jatqan sala retinde sıpattalady. Mal men qus sanynyń turaqty túrde ósip kele jatqany osyny kórsetedi. Sonymen birge mal ónimderiniń sapasy jyldan jylǵa artyp, ónimdiligi kóterilip keledi. Qazir elimiz ózin ózi sıyr, qoı, jylqy etimen jáne jumyrtqamen tolyq qamtamasyz ete alady. Sońǵy úsh jylda qus etiniń ımportqa táýeldiligin 51 paıyzdan 35 paıyzǵa deıin azaıtýǵa qol jetkizdik. Aldaǵy tórt jylda bul kórsetkishti eń tómengi deńgeıge deıin azaıtýdy josparlap otyrmyz. Osynyń bári bul salany Úkimettiń jyldan jylǵa turaqty túrde qoldap kele jatqanynyń nátıjesinde júzege asyp otyr», dedi Aýyl sharýashylyǵy mınıstri.
Sonymen qatar ol sońǵy bes jylda mal sharýashylyǵyna beriletin sýbsıdııa kóleminiń 60 paıyzǵa deıin artyp, bıyl 124,5 mlrd teńgege jetkenin tilge tıek etti. Osy sýbsıdııa arqyly Soltústik Qazaqstan oblysynyń mal sharýashylyǵy da jedel damyp kele jatqany atalyp ótti. Ásirese sút óndirý joǵary qarqynmen damyp keledi. 2018 jyldan beri 15 myńnan artyq sıyr saýylatyn 22 taýarly sút fermalary salyndy. Osy jumystarǵa 23 mlrd teńge ınvestısııa quıylyp, 650 jańa jumys oryny ashyldy.
Oblys ákimi Qumar Aqsaqalov Memleket basshysy alǵa qoıǵan mindetterdiń oblysta qalaı oryndalyp jatqanyna toqtaldy. «Oblysta bıyl 76 mlrd teńge quıylǵan 31 ınvestısııalyq joba iske asyrylyp jatyr. Olar 1 myńnan asa adamdy jumyspen qamtyǵan. Sonyń ishinde 17 taýarly sút fermasy, 6 elevator jáne t.b. bar. О́ńirimizde jobalardy AО́K arqyly qarjylandyrýdyń qanatqaqty baǵdarlamasy jumys isteıdi. Biz 4 paıyzdyq ósimmen qaıtarymy 2 jylǵa shegerilgen jeńildetilgen nesıeler beremiz. Sonyń nátıjesinde sońǵy 4 jylda ǵana 22 taýarly sút fermasy salyndy. 2026 jylǵa deıin 52 ferma salý mejelengen. Sonda 1 mln tonnaǵa deıin sút óndiretin bolamyz», dedi oblys ákimi.
Taýarly sút fermalarynyń ashylýynyń nátıjesinde oblysta sońǵy 3 jylda sút óndirý 26 paıyzǵa artty. Sol arqyly sút óńdeýshi zaýyttar burynǵydan 28 paıyzǵa artyq shıkizat qabyldady. Sóıtip, oblys qazir respýblıkada óndiriletin barlyq súttiń tórtten birin óndiredi. Ishki naryqty et jáne et ónimderimen tolyqtyrý úshin 13 myń iri qaraǵa eseptelgen 2 asa iri mal bordaqylaý alańy quryldy. Eýropa elderinen 5 myńǵa jýyq asyl tuqymdy etti jáne sútti mal basy jetkizildi. Bıyl taǵy 6 myń bas jetkizilmek, onyń 1,7 myńy qazirdiń ózinde ákelingen. Qus etine degen suranystyń ımportqa táýeldiligin azaıtý úshin jańadan 3 qus fermasyn salý bastaldy. Olar jylyna 16 myń tonna broıler etin óndiretin bolady.
Qoı basyn arttyrý úshin 5 myń basqa shaqtalǵan 3 asyl tuqymdy reprodýktor ashyldy. Bul jumyspen «Ekpin 2002», «Qaratomar» jáne «Shýǵyla LTD» JShS aınalysady. Jyldyń aıaǵyna deıin onda 20 myńǵa jýyq qoı ósirilmek.
Aıta ketetin bolsaq, qazir oblysta oraq naýqany qyzý júrip jatyr. Oblys ákimi bıyl 1 mln gektar jerge maıly daqyldar egilgenin aıtty. «Osyǵan egisti ártaraptandyrý arqyly qol jetkizip otyrmyz. Qazir oblysta maıly daqyldardy óńdeıtin eki iri kásiporyn bar. Byltyr Qazaqstandaǵy eń iri «Maslodel» zaýytynyń qurylysy bastaldy. Ony 2023 jyly aıaqtaý kózdelgen. Osy zaýyt iske qosylǵanda barlyq maıly daqyldardyń 90 paıyzyn óńdeımiz. Bul jobaǵa 21 mlrd teńge quıyldy», dedi Q.Aqsaqalov.
Respýblıkalyq slet barysynda aýyl sharýashylyǵy qurylymdarynyń keıbir basshylary men mamandary «Eńbek ardageri» medalimen, «Aýyl sharýashylyǵynyń úzdigi» tósbelgisimen nagradtaldy. Vedomstvolyq medaldardy 12, tósbelgini 24 adam aldy. Sonymen birge 49 adam Qurmet gramotalary men Alǵys hattarǵa ıe boldy.
Slet barysynda asyl tuqymdy mal aýksıon arqyly satyldy. Birneshe sharýashylyq soltústikqazaqstandyq fermerlerdiń asyl tuqymdy malyn satyp aldy.
Al slettiń aıaqtalýyna oraı oblystyń mádenıet jáne sport uıymdary mádenı is-sharalar men sporttyq jarystar ótkizip, qonaqtarǵa jaqsy demalys syılady.
Soltústik Qazaqstan oblysy
