Belgili bolǵandaı, jeńil kólik KamAZ kóliginiń tirkemesine soǵylyp, sonyń saldarynan jeńil kólik birden janyp ketken. Maraldy aýylynyń turǵyny Erkebulan Júzbaev órtenip jatqan kólikte es-tússiz jatqan 4 adamdy baıqap, oılanbastan qutqarýǵa bel býǵan.
«Sol kúni keshke jumystan qaıtyp kele jatqan betim edi. Jolda kólik apaty bolǵanyn baıqadym. Bir shette KamAZ kóligi turdy, al odan sál ary qaraı «Aýdı» avtokóligi órtenip jatty. Sol kezde órtenip jatqan kólikke tura júgirdim. Kólik órtke oranyp úlgeripti. Ishinde adamdar jatyr eken. Basqa júrgizýshiler jaqyndaýǵa qorqyp, qarap turdy», dedi Erkebulan Júzbaev.
Ol adamdardy dereý alyp shyqpasa, kólik kez kelgen ýaqytta jarylýy múmkin ekenin aıtty.
«Qolymdy jeıdeme orap aldym, sebebi ystyq metaldy jaı qolmen ustaý múmkin bolmady. Esikti tartyp kórip edim, ashyla ketti. Aldymen bir adamdy súırep shyǵardym. Ony ári qaraı aparyp tastaǵan soń ekinshisine kómekke júgirdim. Ekinshi jolaýshyny da súıreı bastaǵanymda, qasyma kýágerlerdiń biri júgirip kelip kómektese bastady. Jalynmen arpalysyp júrip taǵy eki adamdy shyǵaryp úlgergerdik. Artynsha otqa oranǵan kólik jarylyp ketti», dep baıandady ol.
Jol apatynan zardap shekken adamdar aýrýhanaǵa jetkizildi. Qazirgi ýaqytta úsh azamattyń jaǵdaıy aýyr.
