Mektep sol kisiniń jobasy negizinde 1936 jyly salynsa, oqý ordasynyń qurylysyn júrgizýge jergilikti halyqtyń jekemenshik kúsh kóligi paıdalanylypty.
1920-1930 jyldary aýyldan oqý izdep, áýeli Qostanaıdan muǵalimdik kýrsty, ile Qyzylordadaǵy pedagogıkalyq tehnıkýmdy támamdaǵan ol «Qyzyl muǵalim» atanyp týǵan jerine oralady, sol jerde eńbek jolyn bastaıdy. 1942 jyldyń 5 mamyrynda ózi tilenip maıdanǵa attanyp, erliktiń eren úlgisin kórsetedi. Jeńispen Berlınge jetip, Brandenbýrg qaqpasyna aty-jónin jazyp qaldyrady.
Qazaq, orys, arab tilderine óte jetik bolǵan aǵamyzdyń maıdan dalasynda, gospıtalda jazǵan estelik óleńderi qym-qıǵash joryq oqıǵalaryna toly. Onyń Reıhstagta túsken sýreti men «Maıdan kúndeligi» dápteri búginde Arqalyq qalasynyń murajaıynda saqtaýly tur. Qan keship júrip soǵysqan jaýyngerdiń «Qyzyl Juldyz», «Otan soǵysy» ordenderi men basqa da marapattary murajaıdan oryn alǵan.
Beıbit ómirge oralǵan Ǵabdol-Ǵazız aǵamyz ustazdyq jolyn qaıta jalǵastyrady. Eńbek ete júrip, Qyzylorda qalasyndaǵy pedınstıtýtty syrttaı oqyp bitiredi. Jerlesteri ony omyraýy orden, medalǵa toly maıdanger ǵana emes, sonymen qatar aýdan, oblys, respýblıkalyq basylymdarda óleń-jyrlary jıi jaryq kóretin aqyn retinde de qurmettep, baǵalaıdy. Tabıǵatynan týma talant ıesi aıtys aqyny retinde de jaqsy tanylǵan. «Halyqqa bilim berý isiniń úzdigi» degen ataqqa da alǵashqylardyń biri qatarynda ıe boldy.
Soǵysta alǵan aýyr jaraqatynyń saldarynan 55 jasynda qos qulaǵynan aıyrylyp, múgedek bolyp qalsa da ol on eki múshesi saý adamdaı aldaǵy kúnge ıek arta, úmitpen, armandy tilekpen ún qatýdan jalyqpady. 31 jyl taǵdyr tartqyzǵan teperishke qasqaıa qarsy turyp, rýhyn túsirmeı, týǵan eline qyzmet etti. Búginde ómirin, ómirlik daǵdy-muratyn urpaqqa ónege ǵyp taratsa, káne! Al osynaý kemeńger adamnyń atynda ne bir kóshe, ne bir mektep joq. Bul – elge syn, eldi basqarǵan erge syn.
G.QALMYRZATEGI
Qostanaı oblysy,
Amangeldi aýdany
