Kásipkerlerge beriletin 5 mln teńge grantqa kimder úmitker bola alady? О́ńirlik kásipkerlik jáne ındýstrııalyq-ınnovasııalyq damý basqarmasynyń bólim basshysy Darhan Ermaǵambetov eń áýeli bul qoldaý 2021-2025 jyldarǵa arnalǵan kásipkerlikti damytý jónindegi ulttyq joba sheńberinde iske asyp otyrǵanyn, memlekettik grantqa ekonomıkanyń basym sektorlaryndaǵy shaǵyn kásipkerlik sýbektileri, onyń ishinde isin jańa bastaǵan jas kásipkerler óteýsiz negizde ıe bola alatynyn jetkizdi. Jańa bıznes-ıdeıalardy iske asyrýǵa memlekettik granttar berý qaǵıdalaryna sáıkes, agroónerkásiptik keshen, jeńil ónerkásip jáne jıhaz óndirisi, qurylys materıaldary jáne ózge de metall emes mıneraldy ónimder óndirisi, metallýrgııa, metall óńdeý, mashına jasaý, kólik jáne qoımalaý, týrızm, aqparat jáne baılanys, ǵylymı jáne tehnıkalyq qyzmet, bilim berý, óner, oıyn-saýyq jáne demalys, ózge de kórsetiletin qyzmet túrlerin usyný salalarynan bıznes ashqan azamattar qatysa alady.
– Grantqa úmitker bolý úshin kásipkerlik nysanyndaǵy jumysshylar sany týraly anyqtama, ulttyq joba sheńberinde kásipkerdiń oqýdan ótkenin rastaıtyn, merzimi 2 jyldan aspaıtyn sertıfıkat, beriletin memlekettik grant kóleminen keminde 10% mólsherinde qarajattyń bar ekenin rastaıtyn banktik qujattar, bank shotynan úzindi kóshirme nemese bıznes-jobaǵa qatysatyn jyljymaly jáne jyljymaıtyn múliktiń baǵalaý qunyn rastaıtyn qujattar (halyqtyń áleýmettik osal toptaryn, onyń ishinde 3-toptaǵy múgedektikti qospaǵanda) bolýǵa tıis. Barlyq qujat elektrondy túrde Qoldau.kz portaly arqyly qabyldanady, – deıdi D.Ermaǵambetov.
Kásipker Qoldau.kz portalynda elektrondy ótinimdi toltyryp, qajetti qujattardy júkteıdi. Keıin óziniń bıznes-jobasyn konkýrstyq komıssııanyń otyrysynda tanystyrady. Komıssııa ótinimderdi qaraý kezinde bıznes-ıdeıalardyń jańashyldyǵy, básekege qabilettiligi jáne qoldanysqa engizýge daıyndyǵy boıynsha baǵa beredi. Bul rette naqty eldi mekende nemese aýyldyq okrýgte buryn óndirilmegen taýarlar shyǵarýdy, qyzmetter kórsetýdi nemese jetildirilgen tehnologııalardy qoldanýdy kózdeıtin jobalarǵa basymdyq beriletinin atap ótken abzal.
Byltyr árqaısysy 5 mln teńgeniń qaıtarymsyz grantyn 21 adam ıelense, bıyl jyl basynan 7 adam osyndaı qoldaýǵa ıe bolypty. Úzdik shyqqandardyń deni óńdeý ónerkásibi, onyń ishinde jeńil, jıhaz jáne tamaq ónerkásibi, sonymen qosa aýyl sharýashylyǵy salalarynda kásipterin damytýda.
Atap óterligi, byltyr 29 jasqa deıingi 10 jas kásipker jeńimpazdar qatarynan tabylsa, jyl basyndaǵy konkýrsta biryńǵaı jas bıznesmender tańdaldy. Jalpy sany 9 joba aýyldyq jerlerde júzege asyp jatyr. Al 2022 jyl boıynsha tegin granttarǵa qazynadan jalpy somasy 89 mln teńge bólingen.
Aqqýly aýdanynyń jas kásipkeri Ádilǵazy Momyn – osyndaı múmkindikke ıe bolǵan azamattyń biri. Ol bul qarajatqa sút salqyndatqysh pen sút saýýǵa, sút tartýǵa arnalǵan qural-jabdyqtar satyp alǵan. Nátıjesinde onyń sharýashylyǵynda 1 operator, 2 sút saýýshy jáne 1 mal qaraýshy jumysqa qabyldanypty. Al Ekibastuz qalasynan qatysyp, joly bolǵan Symbat Mahmet qaıtarymsyz qarajatty gıdropondyq jolmen mal azyǵyn ósirýge jumsaǵan. Aıtýynsha, ol ósiretin bıdaı ekologııalyq jaǵynan taza ónim ári suranysqa ıe. Gıdropondy jem-shópte dárýmen mol bolatyndyǵyna baılanysty tórt túlik pen qus tez qońdanyp, et jınaı bastaıdy, al sıyrdyń súttiligi artady eken.
Pavlodar oblysy
