«Ádiletti memleket. Birtutas ult. Berekeli qoǵam» dep atalatyn jańa Joldaý «Jańa ekonomıkalyq saıasat», «Naqty sektordy damytý», «El bolashaǵyna arnalǵan strategııalyq ınvestısııa», «Memlekettik basqarý isin qaıta jańǵyrtý», «Zań jáne tártip» syndy baǵdarlardan jáne taǵy bir tyń saıası reformalardy qamtıtyn qorytyndy bólimnen turady.
Májilis Tóraǵasy Erlan Qoshanovtyń tóraǵalyq etýimen ótken Parlament Májilisiniń VII shaqyrylymy III sessııasynyń alǵashqy jalpy otyrysynda da Q.Toqaevtyń halyqqa Joldaýynyń basymdyqtary talqylandy.
Palata Tóraǵasy sessııada sóılegen sózinde bul Joldaýdyń buryn bastalǵan reformalardyń qısyndy jalǵasy ekenin atap ótti.
Májilis Tóraǵasy eldiń bolashaq damýy men taǵdyryna qatysty aýqymdy máseleler kóterilgen mańyzdy qujatta Memleket basshysynyń alǵash ret bolashaq saılaý naýqandarynyń kestesin jarııalap, elimizdiń búkil saıası júıesiniń jańaryp-jańǵyrýyna jol ashyp bergenin aıtty.
«Bul bıliktiń ashyqtyǵyn jáne memleket pen qoǵam arasyndaǵy senimniń nyǵaıýyn aıqyn kórsetedi ári elimizdiń jańarý jolynda jasalǵan nyq qadamdar», dedi Palata Spıkeri.
«Depýtattardyń óńirlerge sapary kezinde jurtshylyq kótergen ózekti, kúrdeli máselelerdiń barlyǵyna derlik Joldaýda jaýap berildi», degen E.Qoshanov: «Negizinen Memleket basshysy Joldaýda aıtqan barlyq másele qoǵam suranysyna saı keledi. Qazir qazaqstandyqtardy tolǵandyratyn eń basty másele – ekonomıkanyń damýy, halyqtyń ál-aýqatyn arttyrý. Eldi baǵa men tarıfterdiń ósýi alańdatyp otyr», dep málimdedi.
«Memleket basshysy «Azamat – bıznes – memleket» arasyndaǵy qatynasty túbegeıli ózgertýdi usyndy. Onyń basty maqsaty – bıznes ashyp, kásipkerlikpen aınalysý úshin teń múmkindikter jasaý, ekonomıkalyq erkindikti qoldaý, memlekettiń ekonomıkaǵa shekten tys aralasýynan bas tartý. Sonymen birge salyq jáne bıýdjet júıesin jańǵyrtýǵa, bıýdjet qarajatynyń tıimdiligin arttyrýǵa, memleket-jekemenshik áriptestigi men memlekettik satyp alý mehanızmderin jetildirýge, otandyq bıznes úshin nesıe resýrstarynyń tapshylyǵy máselesin sheshýge erekshe basymdyq berilip otyr», dedi bul jaıynda Májilis Tóraǵasy.
Halyqtyń qamyn oılaý, olarǵa qamqorlyq tanytý, sapaly bilim berý, medısınalyq qyzmetterdi jaqsartý, jastar men pedagogterdi qoldaý sııaqty máseleler – memlekettiń basty nazarynda. Mańyzdy qujatta aıtylǵan ózekti máseleler jetkilikti. Máselen, Prezıdent eki jyl ishinde 650 eldi mekende medısınalyq nysandar salynatynyn málimdedi. Tótenshe jaǵdaı rejiminde jumys isteıtin jáne úsh aýysymda oqıtyn mektepter máselesi sheshiledi. 2025 jylǵa qaraı 800 myńnan astam bala zamanaýı mektepterde oqıdy. Eń tómengi jalaqy deńgeıi 60 myńnan 70 myń teńgege deıin ósedi, bul 1,8 mıllıon azamattyń tabysyna tikeleı áser etedi.
«Bıylǵy Joldaýdaǵy tyń bastama – bul balalar 18 jasqa tolǵanǵa deıin olardyń arnaıy jınaqtaýshy shottaryna Ulttyq qordyń jyl saıynǵy ınvestısııalyq tabysynyń 50 paıyzyn aýdarý. Bul áleýmettik ádildik ornatýdyń bastamasy», dedi Májilis Tóraǵasy.
E.Qoshanov Joldaý júktegen mindetterge oraı sot jáne quqyq qorǵaý, memlekettik basqarý júıelerinde de biraz reformalar júrgiziletinin jetkizdi. «Budan bólek, biz memlekettik satyp alý týraly jańa zań qabyldaý, Qylmystyq jáne Qylmystyq-prosestik kodeksterdi jetildirý, Qala qurylysy kodeksin qabyldaý boıynsha jumysqa kirisetin bolamyz. Májilis depýtattary aldynda konstıtýsııalyq reformalar aıasynda da birqatar zańdy qabyldaý mindeti tur. Bul – jalpyhalyqtyq referendýmda qazaqstandyqtardyń kópshiligi daýys bergen eldi demokratııalandyrý jónindegi úlken qadam», dedi ol.
Prezıdenttiń Joldaýda Parlament jumysynyń negizgi baǵyttaryn aıqyndap bergenin shegelep ótken Palata Spıkeri: «Aldaǵy sessııada depýtattar jumys isteıtin zań jobalarynyń erekshe mańyzy bar jáne ony qoǵam da kútip otyr. Sondyqtan olardy qaraý kezinde halyqtyń, azamattyq qoǵam ókilderi men sarapshylardyń pikiri meılinshe eskerilýge tıis», dedi.
Jumys toptarynyń otyrystary, zań jobalardyń tanystyrylymy sııaqty barlyq jıynǵa jurtshylyqty keńinen qatystyrý qajettigin aıtqan E.Qoshanov sózin: «Parlament jumysynyń negizgi baǵyttary aıqyn. Sondyqtan bar kúsh-jigerimizdi el Prezıdentiniń bastamalaryn qoldaýǵa jáne júzege asyrýǵa jumyldyrýymyz kerek», dep túıindedi.
