Túsi qara nemese sur avtokólikter kóbirek jol apatyna ushyraıtyn kórinedi

ASTANA. 13 mamyr. Elimizdegi saqtandyrý kompanııalarynyń biri 2013 jyly jol apatyna ushyraǵan jeńil avtokólikterge qatysty túrli statıstıkalyq málimetterge súıene otyryp, jol kólik oqıǵasyna meıilinshe kóbirek qandaı tústi mashınalar tap keletin zerttedi. Bul týraly «24kz» habarlady. Zertteý nátıjesinde anyqtalǵandaı, aq, sarǵysh, sary, fıolet tústi avtokólikter keleńsiz jaǵdaıǵa basqalarǵa qaraǵanda edáýir az kezigetin kórinedi. Mamandardyń pikirinshe, aq, sarǵysh jáne fıolet tústi mashınalar jolda anyq kórinetindikten apatqa sırek túsedi eken. Al, jurtshylyqqa kóbirek unaıtyn qara jáne sur tústi temir tulparlar jol apatyna meıilinshe jıi-jıi ushyraıtyn bolyp shyqqan.  Naqtylaı aıtqanda, sur qara tústi árbir besinshi avtokólik bir ret bolsa da jol kólik oqıǵasyna kezikken. Mamandar muny tań ata ári kesh batqan kezde kúmis jáne qara tústi avtokólikter jol ústinde kózge áreń iligetinimen túsindiripti. Sol sııaqty, qyzyl avtokólikter de  qaýipti eken. О́ıtkeni, qyzyl kólikti ádette jas jigitter men qyzdar tańdaıdy. Al, jol apatyna tap keletinderdiń kóbisi osy toptaǵylar. Keıbir derekterge qaraǵanda, elimiz boıynsha jol-kólik oqıǵasyna kináli 24 pen 33 jas aralyǵyndaǵy er azamattar jalpy jol apatynyń  37 paıyzyn,  qyzdar 38 paıyzyn quraıdy. Mamandardyń paıymdaýynsha, qara nemese qyzyl tústi mashınany qalaıtyn júrgizýshiler ádette júıitkip júrgendi jaqsy kóredi. Ári sporttyq avtokólikterdiń kóbi qara nemese qyzyl tústi kórinedi. Reti kelgende aıta keteıik, 2013 jyly elimiz boıynsha 23 359 jol apaty tirkelipti. Sonyń saldarynan 3 myńnan asa adam qaıys bolyp, 29 myń jan túrli jaraqat alǵan. Joldybaı Bazar. Derekkóz: «24kz». Foto: semey.tv.