Aıyppul kólemin kóbeıtý jol apattarynyń azaıýyna septigin tıgizedi

ASTANA. 13 mamyr. Ákimshilik polısııa komıteti jol qozǵalysy erejesin buzǵandarǵa salynatyn aıyppul kólemin ulǵaıtý qajet dep esepteıdi. Bul týraly «QazAqparat» habarlady. Komıtet tarapynan aıtylǵandaı, jol qozǵalysy qaýipsizdigine qatysty ózgerister jol-kólik oqıǵalary men odan japa shegetinderdiń sanyn kemitedi ári júrgizýshilerdiń  quqyqtyq bilimin kóteredi. Vedomstvonyń keltirgen deregine súıene sóılesek, 2012-2013 jyldar aralyǵynda elimizde jol erejeleriniń buzylýy kúrt ósken.  Osydan kelip, jol apatynan qaıtys bolǵandar men jábir kórgender sany artqan. 2013 jyldyń ózinde baqylaý-ólsheý tehnıkalyq quraldary kómegimen tirkeýge alynǵan jol erejelerin buzý jaǵdaılary shamamen 90 paıyzǵa, oqıǵalar 65 paıyzǵa, odan jaraqat alǵandar 71 paıyzǵa kóbeıgen. Mundaı keleńsizdikterdiń  90 paıyzy júrgizýshilerdiń kinásinen bolsa, 600-ge jýyq oqıǵa spırttik ishimdik ishken azamattardyń kesirinen, árbir tórtinshi jol-kólik oqıǵasy talap etilgen jyldamdyq mólsheri saqtalmaǵannan oryn alǵan.  Sondaı-aq, ótken jyly barlyq jol apatynyń 30 paıyzdan astamy qarsy baǵytqa shyǵyp ketýden bolǵan. Endi, júrgizýshi joldyń qarsy baǵytyna ótip ketse jáne jol polısııasynyń avtokólikti toqtatý jónindegi zańdy talabyn oryndamasa, onda ol júrgizýshilik kýáliginen aıyrylady. Al jańa zańnamaǵa sáıkes, aıyppuldar 1,5-2 esege, tipti keıbir bap boıynsha 3 esege deıin kóterilgeni belgili. Aıyppuldardyń kólemin belgileý kezinde jol apattary az bolatyn elderdiń tájirıbesi eskerilipti. Komıtet qyzmetkerleriniń aıtýynsha, jol erejesin saqtamaǵandar úshin joǵary aıyppul Fınlıandııa men Shveısarııada salynady eken. Bul memleketterde aıyppul kólemine shek qoıylmaǵan. О́ıtkeni, kináli júrgizýshi qansha aıypaqy tóleıtini onyń  jyldyq kirisine baılanysty eken. Fınlıandııada jyldamdyqty  saqtamaǵandar úshin salynatyn eń az aıyppul  bir jarym myń evrony quraıdy  (379 myń teńge), baǵdarshamda "qyzyl" janyp turǵanda júrgeni úshin 90 evro (shamamen 23 myń teńge), al qaýipsizdik beldigin taqpaǵany úshin 135 evro (34 myń teńge) tóleıdi. Joldybaı Bazar. Derekkóz: «QazAqparat». Foto: mediaovd.kz.