Qıyndyqty birge eńseremiz

Arys qalasynda 2019 jyly bolǵan tehnogendik sıpattaǵy tótenshe jaǵdaıda qalany qal­pyna keltirýde qol ushyn sozǵan qostanaılyq aǵaıynnyń ıgi isin umytpaǵan arystyqtar zardap shekken turǵyndarǵa kómek kórsetý maqsatynda aqshalaı, azyq-túlik, kıim jáne eń qajetti zattar jınaýda. Olardyń qatarynda qarapaıym azamattar da, shaǵyn bıznes ókilderi de bar.

Arys halqy bir kúnde 3 tonna un, 100 adamǵa laıyqtalǵan tósek jabdyqtary, 1 tonna makaron, 500 lıtrge jýyq ósimdik maıy, 10 tonna aýyz sý, tonna kartop já­ne 1 tonna sábiz, 3 tonna pııaz, 1 aýyr júk kólik qaýyn, jarty tonna oramjapyraq sekildi tez buzylmaıtyn azyq-túlik ónimderi, gıgıena quraldary jáne birinshi kezektegi qajetti zattardy Qostanaı oblysyna jóneltti. Sondaı-aq Maqtaaral aýdanynyń ákimi Baqyt Asanovtyń bastamasymen maqtaaraldyqtar bir túnniń ishinde órtten zardap shekken qostanaılyqtar úshin jınaǵan 23 tonnadan astam gýma­nı­tarlyq kómek tıegen úlken júk kóligi alys jolǵa attan­dy. Az ýaqyttyń ishinde qostanaı­lyq­tardyń suranysyna saı eń bi­rinshi qajetti azyq-túlik ónimderin, gıgıenalyq zattar men tósek-oryn jabdyqtary jınal­ǵan. «Maqtaaraldyqtar tasqyn sýdan zardap shekkende búkil Qazaqstan halqynyń, onyń ishinde qostanaılyqtardyń kómegin umytqanymyz joq. Mine, búgin qostanaılyq baýyrlarymyzdyń basyna túsken qaıǵy-qasiretti bólisý úshin eń alǵashqylardyń biri bolyp gýmanıtarlyq kómekti jiberip otyrmyz. Bizdiń kúshimiz – birlikte. Biriksek qana bul qıyndyqty da jeńe alamyz», deıdi maqtaaraldyqtar.

Qostanaı oblysyndaǵy órtten japa shekken turǵyn­darǵa kómektesý nıetinde oblys ákimdiginiń memlekettik qyz­met­shileri 1 kúndik jalaqylaryn aýdarsa, kásipkerler de qarjylaı kómekterin kórsetýde. Alǵashqy kúni 70 mln teńge Qostanaı obly­syna kómek retinde jınaldy. Oblysta birneshe gýmanı­ta­r­lyq kómek qabyldaý pýnktteri ashylǵan. Qazaqstan halqy Assambleıasynyń aýdan-qaladaǵy fılıaldary da kómek kórsetýde belsendilik tanytýda. Sondaı-aq 17 aýdan, qalalyq «Jastar re­sýrstyq ortalyqtary» ǵıma­rat­tarynda gýmanıtarlyq kómek jınaqtalýda. Gýmanıtarlyq kómektiń alǵashqy legi jóneltilip úlgergen. Jýyq arada qosymsha taǵy da 20 tonnalyq 2-3 júk kóligi Qostanaı oblysyna jibe­riledi.

Túrkistan oblysy