Abattandyrylǵan aýdandar men turǵyn alaptar arasyndaǵy teńsizdikti joıý úshin qala ákimi shalǵaı aýdandarǵa baryp, turǵyndarymen kezdesti.
Qala basshysy óziniń áleýmettik jelidegi paraqshasynda qazirgi ózekti máselelerdiń biri – ınjenerlik jeliler ekenin atap ótti. Qalanyń turǵyn úı alaptarynda 50 km ınjenerlik jeliler, onyń ishinde 11 km káriz, 20,7 km sýmen jabdyqtaý jelileri, 3 km astam nóser kárizi salyndy. Bıyl taǵy 10 shaqyrym ınjenerlik jelilerdiń qurylysy aıaqtalady dep kútilýde.
«Eldi mekenderdi jeke-jeke aralap, jergilikti turǵyndarmen kezdesý ótkizemiz. О́ndiris turǵyn alabynyń turǵyndarymen kezdestim. Osyǵan deıin qala turǵyndary oqý oryndaryna baılanysty, naqtyraq aıtqanda №12 mektep boıynsha ózekti másele qozǵaǵan edi. Bul mektep osydan 60 jyl buryn salynǵan, qazir apatty jaǵdaıda. Al ishindegi qurylymdary jaramsyz kúıde tur. Onyń ǵımaratyn buzdyq, qazir ornyna jańa, jaıly mektep salý jumysy bastaldy. Ony 2023 jyly aıaqtaýdy josparlap otyrmyz», dep jazdy Altaı Kólginov.
Sondaı-aq ákim jeke ınvestor esebinen balabaqshanyń qurylysy júrgizilip jatqanyn habarlady.
«Jeke ınvestor esebinen balabaqshanyń qurylysy júrip jatyr. Budan bólek, Chehoev kóshesindegi (О́ndiris eldi mekeni) apatty úılerdiń turǵyndarymen kezdestim. Ondaǵy úılerdiń bir bóligin 2024 jylǵa arnalǵan buzý tizimine engizemiz. Beınebaqylaý kameralaryn ornatý, jol máselesi, aýla klýbtary, abattandyrý sekildi túrli problemalar qozǵaldy. Bul máselelerdi sheshý jumysy qolǵa alyndy», dep atap ótti qala basshysy.
Aıta ketsek, turǵyn úı alaptarynda 680 km gaz taratý jelisi salynyp bitti. Búgingi tańda Almaty jáne Saryarqa aýdandary gazǵa qol jetkizýmen qamtamasyz etilgen. Baıqońyr jáne Esil aýdandarynda gaz qubyryn tartý jumystary júrgizilýde.
Sońǵy jyldary tek turǵyn alaptarynda ǵana 250 kóshe salynyp, jóndeý jumystarynan ótti. Ákimniń aıtýynsha, bıyl taǵy 70-ke jýyq kóshe asfaltpen jabylady, jumystardyń basym bóligi aıaqtalyp úlgerdi. Turǵyn alaptarynda 300-den astam aýlalar men qoǵamdyq keńistikter abattandyryldy, dene shynyqtyrý-saýyqtyrý keshenderi, birqatar oqý oryny salyndy.
«Memleket basshysy qalanyń shet aýmaqtaryn damytýǵa erekshe kóńil bóledi. Bizdiń maqsatymyz – eldi mekenderge qajetti ınfraqurylym júrgizip, turǵyn úıler, áleýmettik nysandar, demalys oryndaryn salý», dep qorytyndylady ákim.
