Byltyrǵy qýańshylyqta oblys dıqandary osy mezgilde gektar berekesin 7,2 sentnerden aınaldyrǵan bolatyn. Bıylǵy ónim birshama táýir. Áıtkenmen, barlyq aýdandarda jaǵdaı birkelki emes. Máselen, mamyr-maýsym aılarynda keıbir aýdanda jaýyn jaýmady. Dál kerek kezinde ylǵal bolmaǵandyqtan, topyraqtyń astyndaǵy dán kógerip, kóktep shyqqanymen, boı salyp óspeı, býlyǵyp jatyp aldy.
– Egin oraǵyn aıaqtap qaldyq, – deıdi Qorǵaljyn aýdanyndaǵy «Agrofırma Jer 888» seriktestiginiń basshysy Abaı Medeýbaev, – dál kerek ýaqytynda kókten ımeı, jigerimiz qum boldy emes pe? 6 myń gektar alqapqa dándi daqyldar tuqymyn sińirgen bolatynbyz. Qazir kórshilerge kómek qolyn sozýdamyz. Jalpy jaǵdaı týraly aıtatyn bolsaq, geosaıası jaǵdaıǵa baılanysty qosalqy bólshektiń quny aspandap ketti. Tipti úsh ese qymbattady. Bul jaıt dıqandarǵa keri áserin tıgizip tur. Onyń ústine tyńaıtqyshtardyń baǵasy da ýdaı. Al bıdaı baǵasy burynǵy qalpynda. Árıne, biz de nannyń qymbattaǵanyn qalamaımyz, biraq dán ósirýge jumsalǵan shyǵyn qaıtýy kerek qoı.
Alqap tósindegi dıqandardyń aıtýyna qaraǵanda, janar-jaǵarmaıdan tapshylyq joq. Aldyn ala eseptelip berilgen ótinimderge baılanysty der shaǵynda jetkizilýde. Aýa raıy da qolaıly bolyp tur. Egin oraǵy bastalǵan kezde dán birshama ylǵaldy bolyp, negizgi kúsh astyq qabyldaý kásiporyndaryna túse me degen qaýip bolyp edi. Sońǵy kúnderi kún ysyp, dán keýip, ylǵal azaıdy.
– Egin oraǵyn órmek júzinen aýdardyq, – deıdi «Eńbek» jaýapkershiligi shekteýli seriktestiginiń basshysy Qýanysh Raqyshev, – qazir bizde ǵana emes, jalpy dıqandardyń aldyna oralǵy bolyp turǵan másele – tehnıka men qosalqy bólshektiń qymbattaýy. Buryn Reseıden jáne taıaý shetelderden jetkiziletin qosalqy bólshekter toqtap qaldy. Tipti dıllerler de taptyrmaı ketti. Erte kóktemnen beri egis mádenıetin barynsha saqtap, barlyq talapty muqııat oryndaǵandyqtan bolar, gektar berekesi byltyrǵa qaraǵanda áldeqaıda jaqsy.
Biz sóılesken aýyl sharýashylyǵy qurylymdarynyń basshylary aıtarlyqtaı qolbaılaýdyń joqtyǵyn aıtyp otyr. Tek naýqandyq emes, jalpy jaǵdaı týraly túıtkildi máseleniń túıinin taratatyn bolsaq, bul – mehanızator kadrlardyń jetispeýshiligi.
– Aýylda qazir kombaındy tizgindeıtin adam qalmady. Jyl saıyn izdep, tabanymyzdan taýsylyp júrgenimiz, – deıdi «Qulan» seriktestiginiń basshysy Qulan Bolatov, – aldaǵy ýaqytta oblystyq aýyl sharýashylyǵy basqarmasy óńirge qansha mehanızator qajet ekendigin eseptep, kásiptik-tehnıkalyq kolledjdermen baılanys jasap, bilim alýshylardy óndiristik tájirıbeden ótkizip, bul jaıdy túbegeıli sheshý kerek tárizdi. Jalǵyz kombaınshy ǵana emes, dánekerleýshi de qasqaldaqtyń qanyndaı taptyrmaıdy. Bul bir kúndik qıyndyq emes, jalpy eldiń, onyń ishinde aýyl sharýashylyǵy qurylymdarynyń bolashaǵyna baılanysty dúnıe emes pe?!
О́ńirde qazir jerde ósken dándi jerde qaldyrmaý baǵytynda qyrýar jumys atqarylýda. Kúzgi egin oraǵymen birge qys qamy da oılastyrylyp, malsaq qaýym mal azyǵyn daıyndaýdyń sońǵy sharalaryn qolǵa alǵan.
Aqmola oblysy
