Qolushyn berýge nıetti azamattar kómekti Shyǵys Qazaqstan oblystyq Amanat partııasy fılıalynda ornalasqan gýmanıtarlyq pýnktke ákeldi.
– Partııa tóraǵasynyń tapsyrmasyna sáıkes 4 qyrkúıekten bastap Shyǵys Qazaqstan oblysy boıynsha órtten zardap shekken Qostanaı oblysy, Áýlıekól aýdany Amanqaraǵaı aýylynyń turǵyndaryn qoldaý maqsatynda partııanyń bir oblystyq jáne 11 aýmaqtyq fılıalynda arnaıy gýmanıtarlyq kómekterdi jınaý pýnkti ashyldy. Igi is-sharaǵa partııa belsendileri, depýtattar, kásipkerler, qarapaıym turǵyndar atsalysyp jatyr, – dedi Amanat partııasy Shyǵys Qazaqstan oblystyq fılıalynyń atqarýshy hatshysy Saırangúl Jumadilova.
Qazirgi ýaqytta partııanyń oblystyq fılıalynda ornalasqan gýmanıtarlyq pýnktke 14 tonna un, 3 tonna mıneraldy sý, 5 tonna makaron, 10 tonna kúnbaǵys maıy jáne 3 tonna ózgede dándi-daqyldar jınaldy.
Sonymen qatar birinshi qajetti zattar kórpe-jastyq, kıim-keshek, turmystyq tehnıkalar, gıgıenalyq zattar qattaldy. Jınalǵan gýmanıtarlyq kómekti júk kólikterine tıeý úshin oblystaǵy joǵary oqý oryndary men kolledjderdiń stýdentteri jáne eriktiler toby qolǵabys etti.
Jınalǵan gýmanıtarlyq kómekti tıegen kólik kóp bógelmeı Qostanaı oblysyna jolǵa shyqty. Aıta keterligi, óńir jurtshylyǵyn qoldaýǵa arnalǵan ıgi is-shara osymen toqtalmaı, jalǵasyn tabady.
Shyǵys Qazaqstan oblysy
