Azamattyq avıasııa komıtetiniń tóraǵasy Talǵat Lastaev «Nursultan Nazarbaev halyqaralyq áýejaıy» AQ Dırektorlar keńesi múshelerimen otyrys ótkizdi.
Otyrys barysynda QR IIDM ishki aýdıt qyzmetiniń bıylǵy tamyz aıynda elorda áýejaıyna jasaǵan tekseris qorytyndysy talqylandy.
Aýdıtorlyq is-sharalardyń qorytyndysy boıynsha áýejaı basshylyǵy tarapynan jasalǵan kóptegen kemshilikter men birqatar zań buzýshylyqtar anyqtaldy. Atap aıtqanda, satyp alý rásimderiniń memlekettik satyp alý portalynan tys júrgizilýi, kelisimsharttardy jasaý barysynda ashyqtyqtyń bolmaýy, eńbekaqy tóleý júıesindegi buzýshylyqtardyń oryn alýy, janar-jaǵar maı materıaldaryn zańsyz bosatý, uıymdyq qurylymdy qurýdaǵy beı-bereketsizdik, Qoǵam basshylyǵy arasyndaǵy qyzmettik mindettemelerdi zańsyz bólý syndy zańdylyqqa qaıshy áreketter jasalǵany anyqtalǵan.
Sonymen qatar dırektorlar keńesi áýejaıdaǵy birqatar qyzmetterdi aýtsorsıngke berý kezinde qajetti talaptardyń saqtalmaǵanyn anyqtaǵan. О́z kezeginde bul atalǵan qyzmetterdiń tıimsizdigine ákep soqqan.
Otyrys qorytyndysy boıynsha áýejaı basqarmasyna arnaıy taldaý júrgizip, aýdıt nátıjesinde anyqtalǵan buzýshylyqtardy qaıta qalpyna keltirýge baǵyttalǵan jospar qurý júkteldi. Sondaı-aq uıym qurylymyn qaıta qaraý, memlekettik satyp alýlar kezinde zań talaptaryn qatań saqtaý, janar-jaǵar maı materıaldary shyǵyndaryna baqylaýdy kúsheıtý, qyzmet kórsetý boıynsha kelisimsharttardyń tıimdiligine revızııa júrgizý mindetteldi.
Budan bólek, zańsyzdyqqa jol bergen jaýapty tulǵalardy jaýapkershilikke tartý máselesi de tapsyryldy.
Buǵan deıin habarlanǵandaı, birden bir aksıoner – QR Indýstrııa jáne ınfraqurylymdyq damý mınıstrliginiń sheshimimen 2022 jylǵy 6 qyrkúıekte «Nursultan Nazarbaev halyqaralyq áýejaıy» AQ Basqarma tóraǵasy Ǵabıt Qalıuly Tájimuratovtyń ókilettigi merziminen buryn toqtatyldy. Basqarma tóraǵasynyń mindetin ýaqytsha atqarýshy bolyp tóraǵanyń orynbasary Muhıden Ábildınov taǵaıyndaldy.
