Jerge qatysty mańyzdy máselelerdi ortaǵa salatyn jıynǵa «Jer amanaty» komıssııasynyń músheleri jáne tıisti sala basshylary qatysty. Otyrystyń kún tártibinde paıdalanylmaıtyn jáne Qazaqstan Respýblıkasynyń zańnamasyn buza otyryp berilgen jerlerdi memlekettik menshikke qaıtarý tóńireginde qabyldanyp jatqan sharalar týraly jáne Ulan aýdanynda et óńdeý keshenin salý maqsatyndaǵy jer bólý máselesi qaraldy.
– Prezıdent Qasym-Jomart Toqaev buǵan deıin paıdalanylmaı jatqan jaıylymdyq jerlerdi memleket menshigine qaıtarý jóninde naqty tapsyrma berdi. Búgingi kúni respýblıka kóleminde aýyl turǵyndary úshin jaıylym jerdiń jetispeýshiligi óte ózekti másele. Jaıylym máselesi uzaq ýaqyt boıy qordalanyp keldi. Respýblıka kóleminde atalǵan máseleni sheshý úshin oblystyq fılıaldardyń janynan «Jer amanaty» komıssııalary qurylyp, belsendi jumys isteı bastady. Biz de bul jumysqa laıyqty úlesimizdi qosamyz dep senemin, – dedi «Jer amanaty» komıssııasynyń tóraǵasy, partııanyń Shyǵys Qazaqstan oblystyq fılıalynyń atqarýshy hatshysy Saırangúl Jumadilova.
Aıta ketsek, Shyǵys Qazaqstan oblysynda bos jatqan jerlerdi memleket menshigine qaıtarý maqsatynda jumystar qarqyndy júrgizilýde. Búgingi kúnge deıin oblys kóleminde memlekettik menshikke aýyl sharýashylyǵy maqsatyndaǵy 37,1 myń gektar jer qaıtaryldy. Bul da júıeli túrde atqarylǵan jumystyń jemisi.
– Úkimet jyl sońyna deıin paıdalanylmaı jatqan 5 mln gektar jerdi, onyń ishinde Shyǵys Qazaqstan oblysy boıynsha 100 myń gektar jerdi memleket menshigine qaıtarý mindetin qoıdy. Shyǵys Qazaqstan oblysynyń jańa shekaralaryndaǵy qalalar men aýdandardyń jergilikti atqarýshy organdary 19,6 myń gektar paıdalanylmaıtyn aýyl sharýashylyǵy alqaptaryn anyqtady, – deıdi ShQO Jer qatynastary basqarmasynyń basshysy Nadejda Mıheılıs.
Atalǵan sıfrdy tarqatyp aıtar bolsaq, memlekettik menshikke qaıtarylǵan jerdiń 4,3 myń gektary – jer ýchaskelerin jaldaý sharttaryn buzý jolymen qaıtaryldy. 15,4 myń gektar – materıaldyq jáne memlekettik baqylaý júrgizý úshin Jer resýrstaryn basqarý departamentine qaraýǵa jiberildi.
Sonymen qatar Qoldau veb-portalynda sıfrlyq monıtorıng arqyly oblys boıynsha 586,4 myń gektar paıdalanylmaıtyn jáne utymsyz paıdalanylatyn jerler anyqtaldy. Onyń ishinde 12 myń gektary memlekettik menshikke qaıtaryldy. Eskertý jumystarynan soń 185,6 myń gektar jerdi ıeleri paıdalanýǵa kiristi. 94,6 myń gektar jerge memlekettik baqylaý júrgizý úshin tıisti qujattary Jer resýrstaryn basqarý departamentine joldandy. Budan bólek, sıfrlyq monıtorıng arqyly oblys boıynsha 760,5 myń gektar paıdalanylmaı jatqan jaıylym anyqtaldy. Bul jerler de búge-shigesine deıin tekseriledi.
2021 jyly veb-portalda 19 myń ga paıdalanylmaıtyn egistik jer anyqtaldy, onyń ishinde 0,2 myń ga alańda jer paıdalanýshylar paıdalanýǵa kiristi, 18,8 myń ga boıynsha materıaldar JAO-da jumysta.
ShQO Jer qatynastary basqarmasynyń basshysy Nadejda Mıheılıstiń málimetinshe, bıyl «Ǵarysh Sapary» veb-portalynda 78,9 myń gektar paıdalanylmaıtyn egistik jer anyqtaldy.
Ras, ıgerilmeı jatqan jerlerdi anyqtaý, ony qaıtarý maqsatynda atqarylǵan jumystar az emes. Jumys júrgizilmese, oblysy boıynsha memlekettik menshikke aýyl sharýashylyǵy maqsatyndaǵy 30,3 myń gektar jer qaıtarylar ma edi?! Álbette, Memleket basshysynyń tapsyrmasyna sáıkes bul jumystar jalǵasyn taba bermek. Komıssııa músheleri turaqty negizde jerdi qaıtarý máselesi boıynsha partııaǵa túsken ótinishterdi qarap, zań aıasynda naqty usynystar ázirlep, «Jer amanaty» respýblıkalyq komıssııasyna usynyp otyratyn bolady.
Otyrystaǵy ekinshi másele, Ulan aýdanynda et óńdeý keshenin salýǵa jer bólý edi. Bul oraıda et óńdeý keshenin salýǵa nıetti ınvestorlar Borsaq aýylyn tıimdi dep tanyǵan. Ol týraly «Jer amanaty» komıssııasynyń otyrysynda Ulan aýdanynyń ákimi Renat Qurmanbaev málimdedi. Alaıda atalǵan keshendi salýǵa birqatar azamat qarsylyq bildirgen. Sebebi et óńdeý dep, jaýyrdy jaba toqyǵymyz kelip otyrǵany – shoshqa fermasy. Sondyqtan da qarsylyq bildirgender bolǵan.
– Et óńdeý keshenin salýdy qolǵa almaq bolǵan ınvestorlar Borsaq aýylyn tıimdi dep otyr. О́ıtkeni bul aýyldy janap temir jol ótedi. Aıta ketsek, et óńdeý kesheninen aýdan bıýdjetine túsetin tabys mol bolmaq. Qarsylyq bildirip júrgen azamat Borsaq aýylynda turmaıdy. Basqa jaqtan kelgen, – deıdi Ulan aýdanynyń ákimi Renat Tileýhanuly.
Aıta ketsek, Ulan aýdanynda et óńdeý keshenin salý úshin 80 gektardan 5 ýchaske bólingen. Qurylys jumystary áli bastalǵan joq.
Shyǵys Qazaqstan oblysy
