Qoǵamdyq qozǵalysty qurý jónindegi bastamany belgili qoǵam jáne saıası qaıratkerler, ǵylymı jáne shyǵarmashylyq zııaly qaýym men bıznes-qoǵamdastyq ókilderi, mádenıet jáne sport qaıratkerleri, sondaı-aq qoǵamdyq uıymdardyń kóshbasshylary kóterdi. Olardyń qatarynda Mereke Qulkenov, Raıymbek Batalov, Aqberen Elgezek, Sergeı Ponomarev, Beknur Qısyqov, Dáýren Qýat, Dáýletkereı Kápuly, Ádil Ahmetov, Nazgúl Qarabalına, Marat Shıbutov jáne taǵy basqa da zııaly qaýym ókilderi bar.
Jınalǵandar birlestik qurýdyń basty ıdeıasy Memleket basshysynyń reformalaryn qoǵamdyq qoldaý men olardy iske asyrýǵa qajetti jaǵdaı jasaýdan týyndaǵanyn aıtady.
«Jalpy, 2019 jyly bastalǵan Prezıdent reformalary kezeń-kezeńimen júzege asyp keledi. Qańtar oqıǵasynan keıin qoǵamdy demokratııalandyrý men lıberaldandyrý prosesteri qarqyndy júrip jatyr. Sondyqtan azamattyq qoǵam osy ózgeristerdiń bel ortasynan tabylýy qajet dep sanaımyz. Bizdiń qozǵalys úgit-nasıhat úshin emes, prosesterge qatysý úshin qurylǵan. Biz qazir reformalardy qoldap, osy mańyzdy kezeńdi sońyna deıin jetkizýimiz kerek», dep atap ótti Qazaqstan Jazýshylar odaǵy tóraǵasynyń birinshi orynbasary Aqberen Elgezek.
Qozǵalysty qurýshylar partııalyq doda alańyn lıberaldandyryp, memlekettik apparattyń kadrlyq quramyn jetildirý sekildi mańyzdy maqsattarǵa baǵyttalǵan saıası jańǵyrý – demokratııalyq prosesterdi jandandyryp, azamattyq qoǵamdy durys arnaǵa bastaıdy dep esepteıdi.
«Qazir elimizdegi saıası partııalar, sondaı-aq saıası partııa qurýǵa daıyn, tirkelý ústindegi, saılaý naýqandaryna qatysý jospary bar birlestikter men jeke tulǵalar boı kórsetip jatyr. Prezıdent búginde barlyq partııadan ózin shettedi. Sondyqtan reformalardy qoldaýǵa arnalǵan qoǵamdyq qozǵalys qurý isin biz reformalarǵa qatysý úshin neǵurlym tıimdi ári yńǵaıly uıym dep sanadyq. Bizdiń qatarymyzǵa nıet bildirgen barlyq azamat qosyla alady. Qazaqstandaǵy ózgeristerdi jaqtaıtyn adamdar sany basym bolady dep senemiz», dedi bastamashyl top ókilderi.
Qozǵalys músheleri árbir qazaqstandyqtyń reformalardyń oıdaǵydaı iske asýyna múddeli ekenin, sebebi onyń árbir kezeńin iske asyrǵan saıyn qarapaıym el azamattarynyń ál-aýqaty men ómir súrý deńgeıi kóterile túsetinin atap ótti.
«Kúni keshegi Joldaýda Prezıdent óskeleń urpaqty qoldaýǵa baǵyttalǵan áleýmettik-ekonomıkalyq sıpattaǵy birqatar sharany jarııalady. Atap aıtqanda, bala týǵanda tólenetin járdemaqy merzimin uzartý, Ulttyq qor tabysynyń bir bóligin barsha qazaqstandyq balalardyń ıgiligine jumsaý, «Samuryq-Qazyna» taza tabysynyń 7%-yn «Qazaqstan halqy» qoryna aýdarý jáne t.b. Bul – qanshama jyldan beri elimizdiń árbir azamaty endi ǵana naqty sezingen keleshek urpaq ıgiligine arnalǵan ınvestısııa. Bul bastamanyń alǵashynda halyq arasynda biraz ábiger týdyrǵany belgili. Halyq qazir osy bastamalardyń barlyǵynyń naqty iske asqanyn qalaıdy. Sol sebepti biz osylardy aıaǵyna deıin jetkizý úshin Memleket basshysyna múmkindik berip, jan-jaqty qoldaý kórsetetin bolamyz», deıdi Halyqaralyq farmasevtıkalyq óndirýshiler qaýymdastyǵynyń prezıdenti Vıacheslav Lokshın.
Kásipkerler atynan sóz alǵan Raıymbek Batalov, dál qazirgi ýaqytta Prezıdent Qasym-Jomart Toqaevtyń tyń reformalaryn qoldaý el bolashaǵy úshin asa mańyzdy ekenin atady. «Ol úshin bizdiń kásibimizdiń, qyzmet etetin salamyzdyń san alýandyǵyna qaramastan, bir ıdeıa men bastamanyń tóńireginde birigýimiz kerek», degen pikirimen sózin tolyqtyrdy kásipker.
«Qasym-Jomart Toqaev Prezıdentti bir ǵana merzimge saılaý týraly jańa usynysyn jurtqa jarııa etti. Bul bolashaqta bılikti menshiktep alýdyń kez kelgen áreketiniń aldyn alady. Depýtattardyń Prezıdentti jetijyldyq bir merzimge saılaý jáne elordaǵa Astana ataýyn qaıtarý jónindegi bastamasy – Ádiletti Qazaqstandy qurý jolyndaǵy óte qajet ári durys qadam. Bul jerde referendým ótkizip jatýdyń qajeti joq. Onsyz da bári túsinikti», deıdi basqosýda sóz alǵan «Juldyz» jýrnalynyń bas redaktory Mereke Qulkenov.
– Reformanyń joly eshqashan jeńil bolǵan emes. Bizdi aldymyzda áli talaı qıyndyq kútip tur. Al ony biz biriksek qana jeńemiz. Bizdiń kúshimiz – birlikte, ádiletke senýde. Biz tulǵanyń aınalasyna shoǵyrlanýǵa úndep otyrǵan joqpyz. Qaıta ıdeıanyń aınalasyna toptasýǵa shaqyramyz. Elimizdi saıası jáne ekonomıkalyq turǵydan reformalaý – Ádiletti Qazaqstanǵa jetkizetin jol, – dep pikir bildirdi saıasattanýshy Marat Shıbutov.
Qozǵalysty uıymdastyrýshylar, elimiz synaqqa toly kezeńdi basynan ótkerip otyrǵanyn, eshkimniń eski júıe boıynsha ómir súrgisi kelmeıtinin, ońdy ári túbegeıli ózgeris qana halyqty jarqyn keleshekke jeteleıtinin tilge tıek etti. Jıyn sońynda qoǵamdyq qozǵalystyń bastamashy ókilderi úndeý joldady.
ALMATY
