Barlyǵy 30 adam eken. Qala ákiminiń orynbasary Azamat Ysqaqovtyń aıtýyna qaraǵanda, jergilikti bılik barlyq jaǵdaıyn jasamaq. Qujattardy rásimdeý, jumysqa ornalastyrý, balalardy mektepke jáne mektepke deıingi mekemelerge ornyqtyrý tarapynan eshqandaı qıyndyq bolmaýǵa tıisti.
Oblystyq jumyspen qamtý jáne áleýmettik baǵdarlamalardy úılestirý basqarmasy basshysynyń orynbasary Sholpan Salyqqyzynyń aıtýyna qaraǵanda, Aqmola oblysyna Túrikmenstannan barlyǵy 165 adamnan turatyn 51 otbasyn kóshirý josparlanǵan. Qandastar Aqkól, Arshaly, Astrahan, Atbasar tárizdi on aýdanǵa jáne oblys ortalyǵyna qonystanbaq. Alǵashqy kezeńde jańa ortaǵa tezirek beıimdelip ketý úshin jan-jaqty qoldaý kórsetilmek. Ár otbasy múshesine 70 AEK kóleminde kómek kórsetilý qarastyrylǵan. Bir aıta keterligi, týǵan jerdiń topyraǵyna oralǵan qandastar mundaı jeńildikterge kvota alǵan soń ıe bola alady.
Kúzdiń túngi aspany da meıirlenip, jyp-jyly bolyp tur. Záý bıikte tananyń kózindeı jarqyraǵan juldyzdar da atajurtqa tabany tıgen támam eldiń janarlaryna sáýlesin túsirip, shapaǵatyn quıyp turǵandaı.
Qandastar da, qarsy alýshy tarap ta qaýqyldasyp, burynnan tanys-bilis, etene jaqyn adamdardaı qaýyshyp jatyr. «Sapar oń bolsyn!», «Kósh kólikti bolsyn!» degen izgi tilekter aıtylýda. Qandastar úmit otyn ala kelgendeı. Máselen, ana tiliniń kirpigi ǵana qımyldaıtyn, salt-dástúrimizdiń juqanasy ǵana qalǵan Kókshetaýǵa jańa lep kelip, kóshpen birge arydaǵy ádemi salt-dástúrimiz oralyp jatsa, kóneniń kúbisi kúmpildep, keneremiz keńip qalmaı ma?!
– Sátin salyp búgin kıeli Kókshe topyraǵyna jettik, – deıdi qandasymyz Hodjabergen Baıbolatov. – Qaı qıyrda júrseń de ata-baba topyraǵy jadyńnan shyqpaıdy ǵoı. Kókirektegi sezimdi kelistirip aıta almaı qınalyp turǵanymdy qarańyzshy. Eń bastysy, myna balapandarym atajurttyń aýasyn jutyp, ottaı ystyq topyraǵyn basatyn boldy. Odan asqan baqyt bar ma?!
Shynynda da solaı-aý!
Kókshetaý
