Mazmundy sapar aıasynda bir top ahmettanýshy ǵalymdar aldymen Qostanaı oblysynyń Áýlıekól aýdanyndaǵy Ahmet atamyzdyń bıýstine gúl shoǵyn qoıyp, odan soń A.Baıtursynuly atyndaǵy Qostanaı memlekettik ýnıversıtetinde dóńgelek ústel ótkizedi. Sodan keıingi is-shara Arqalyq qalasyndaǵy Y.Altynsarın atyndaǵy pedagogıkalyq ınstıtýtyndaǵy ult ustazyna arnalǵan ǵylymı-tájirıbelik konferensııaǵa ulasady.
Budan soń ekspedısııa músheleri Torǵaı jerine bet alyp, jolaı Ahańnyń rýhanı serigi Mirjaqyp Dýlatulynyń Jangeldın aýdany Bıdaıyq aýylyndaǵy kesenesine soǵyp, ult qaıratkeriniń rýhyna duǵa baǵyshtasa, 16 qyrkúıekte ahmettanýshylar Torǵaıdaǵy Ahań men Jaqańnyń eskertkishine taǵzym etip, Alashtyń qos arysy atyndaǵy mýzeıdi aralap, aýdan jurtshylyǵymen júzdesedi. Sondaı-aq ǵalymdar Ahmet atamyzdyń týǵan aýylyna da at basyn tirep, ata-babasynyń zıratyna táý etip, el adamdarymen kezdesedi.
«Aldymyzda uzaq ta qasıetti jol tur. Ahańnyń rýhymen qaýyshý, Ahań rýhyn jańǵyrtý, izi qalǵan topyraqty basyp ótý bólekshe qadam, erekshe sezimmen oryndalatyn is bolsa kerek. Endi osy sapardy abyroımen júrip ótýge jazsyn!» – deıdi ekspedısııa múshesi, belgili ǵalym Bekjan Ábdýálıuly.
