Buǵan deıin stansadaǵy tehnıkalardyń tozý deńgeıi 90 paıyzdan asyp, óńirge mundaı arnaıy kólikter sońǵy ret 2020 jyly alynǵan edi. Osy túıtkildi sheshý maqsatynda oblystyq bıýdjet esebinen, «О́nerkásipti damytý qory» AQ arqyly lızıngtik negizde 100 sanıtarlyq avtokólik satyp alyndy. «Hyundai», «JAC», «GAZel» markaly temir tulparlar GPS-navıgasııamen, shuǵyl kómekke qajetti zamanaýı jabdyqtarmen tolyq qamtylǵan. Josparǵa sáıkes, qyrkúıekke deıin kólikterdiń 67-si oblys ortalyǵyna, 33-i aýdandardaǵy medısınalyq uıymdarǵa úlestiriledi. Saltanatty sharada oblys ákimi Berik Ýálı Memleket basshysynyń tapsyrmasyna sáıkes, halyqtyń turmys sapasyn arttyrý basty mindet ekenin atap ótti.
«Memlekettiń bilim men densaýlyq saqtaý salasyna bólgen qarjysy, eń aldymen, azamattardyń ıgiligine qyzmet etýge tıis. Búgin tabystalyp otyrǵan jedel járdem kólikteri – osy baǵyttaǵy júıeli jumystyń bir parasy. Bul tehnıkalar shuǵyl medısınalyq kómektiń qoljetimdiligin arttyryp, qyzmet sapasyn jaqsartýǵa sózsiz úles qosady», dedi óńir basshysy.
Aıta keteıik, qazir oblystyq jedel járdem stansasynda 872 adam eńbek etedi. Mekeme jylyna 250 myńnan astam shaqyrtýǵa shyǵyp, óńirdiń 620 myń turǵynyna qyzmet kórsetedi.
О́ńirde densaýlyq saqtaý salasynyń ınfraqurylymyn damytý isi de qarqyn alǵan. Byltyr alǵashqy kómek kórsetetin 60-tan astam nysan boı kóterdi. Maqanshy aýylynda kúndizgi stasıonary, zerthanasy, áıelder konsýltasııasy bar dárigerlik ambýlatorııa ashyldy. Aıagóz aýdanynyń kópsalaly ortalyq aýrýhanasynyń reanımasııalyq bólimshesiniń qosymsha qurylysy aıaqtaldy. Osy mekemede magnıttik-rezonanstyq tomograf ornalastyrylatyn ǵımaratpen, Úrjar aýdanynyń kópsalaly ortalyq aýrýhanasy bazasynda «Teri arqyly koronarlyq aralasý ortalyǵy» qosymsha ǵımaratynyń qurylysy bastaldy. Sondaı-aq 300 oryndyq oblystyq kópbeıindi aýrýhana men 200 oryndyq balalar aýrýhanasynyń jobalyq-smetalyq qujattamasy ázirlenip jatyr. Jalpy, oblys ákiminiń baspasóz qyzmeti málim etkendeı, byltyr oblystyń densaýlyq saqtaý salasynyń materıaldyq-tehnıkalyq bazasyn nyǵaıtýǵa 6,5 mlrd teńgeden astam qarjy bólingen.
Abaı oblysy
