Sýret: vestisemey.kz
Oqý ordasynyń №1 Sport kesheninde dástúrge aınalǵan spartakıadanyń saltanatty ashylýymen qatar zaman talabyna saı jańartylǵan basseınniń tusaýy kesildi.
Erteden «Semeı – stýdentter qalasy» atanǵanyn eskersek, bilim alýshy jastardyń ıgiligine berilgen bul sporttyq nysanda barlyq qajetti jaǵdaı eskerilgen.
Shákárim ýnıversıtetiniń jyldar boıǵy qalyptasý kezeńin jetik biletin Ardager ustaz Anatolıı Sıdelnıkov spartakıadanyń ashylý saltanatynda basseın ornalasqan ǵımarat tarıhyna da toqtaldy. Ardagerdiń aıtýynsha, bul sport kesheni osydan 46 jyl buryn stýdentter men qala turǵyndarynyń birlesken eńbegimen salynǵan.
«1980 jyldyń qyrkúıeginde júzý basseıni iske qosylyp, osy keshende qalalyq, oblystyq, respýblıkalyq, tipti, 1982 jyly Búkilodaqtyq deńgeıdegi jarystar ótkizildi. Ol kezde bul deneshynyqtyrý salasy boıynsha oblystaǵy jalǵyz keshen bolatyn. Búgingi jańǵyrtylǵan nusqasyn kórip, shynymen de tańǵalyp turmyn. Jóndeý jumystary jaqsy júrgizilgen, keshenniń jańa kelbetine kóńilim toldy», dedi qart ustaz aǵynan jarylyp.
Uzaq jyldar boıy túrli zaman qubylysynyń áserinen qoldanystan shyǵyp qalǵan júzý basseıni byltyr kúrdeli jóndeýden ótip, qaıta iske qosylǵany ýnıversıtet stýdentteri úshin jyl bastalǵandaǵy úlken syı bolǵany daýsyz.
Qazir munda zamanaýı qurylǵylarmen jabdyqtalǵan sport jáne jattyǵý zaldary, fıtnes ortalyǵy jumys istep tur. Jańarǵan ınfraqurylym bilim alýshylardyń sportpen júıeli túrde aınalysýyna, sonyń ishinde júzýdi meńgerýine zor múmkindik berip otyr.
Jalpy aýmaǵy 14h25 metrdi quraıtyn basseın zamanaýı talaptarǵa saı jańǵyrtylyp, aldaǵy ýaqytta ýnıversıtet qaýymy men qala turǵyndarynyń ıgiligine qyzmet etpek.
Abaı oblysy
