«Elordada mektep salý úshin 72 jer telimi belgilendi. Bul jer ýchaskeleriniń aýmaǵy 120 myń oqýshy ornyna (eki aýysymda 240 myń oqýshy orny) arnalǵan oqý oryndaryn salýǵa múmkindik beredi. Atalǵan jer ýchaskeleri áleýmettik nysandarǵa degen qajettilikti eskere otyryp anyqtaldy. Ol qalanyń barlyq aýdanynda ornalasqan», dep jazdy ákim.
Onyń aıtýynsha, áleýmettik nysandardy salýǵa arnalǵan jer ýchaskeleriniń sany jyl saıyn artady. Árbir aýdanda (shaǵyn aýdandarda) oqý oryndary bolýy úshin egjeı-tegjeıli josparlaý jobasyna arnaıy baǵyt bekitilgen.
Máselen, elordada bıyl 11 mektep salynyp, paıdalanýǵa beriledi: Esil aýdanynda – 6 mektep, Almaty aýdanynda – 4 mektep, Saryarqa aýdanynda – taǵy 1 mektep, Baıqońyr aýdanynda – 1 mektep (ol 2023 jyly tapsyrylady). Osylaısha, 23 myńnan astam oqýshyǵa arnalǵan oryn ashylady.
«Aldaǵy 2023 jyly taǵy 13 mektep salyp, paıdalanýǵa berýdi josparlap otyrmyz. Osylaısha taǵy 22 myńǵa jýyq oqý orny ashylady: Esil aýdanynda – taǵy 8 mektep (aýdanda turǵyndar tyǵyz ornalasqanyn eskere otyryp), Almaty aýdanynda – 4 mektep, Baıqońyr aýdanynda – 1 mektep. Sol sııaqty mektep sanyn arttyrý, onyń ishinde jeke qarajat esebinen de kóbeıtý máselesin qarastyramyz.
Memleket basshysynyń tapsyrmasy boıynsha elordada 3 jyl ishinde 34 mektep salyndy. Bul 70 myń oqý ornyn ashýǵa múmkindik berdi», dep jazdy Altaı Kólginov.
