Eńbek jáne halyqty áleýmettik qorǵaý mınıstrliginiń málimetinshe, bıylǵy jyldyń 8 aıynda qazaqstandyqtarǵa 1,9 trln teńgeden astam somaǵa zeınetaqy tólendi.
Bul rette 2022 jyldyń qyrkúıeginde ǵana respýblıkalyq bıýdjetten zeınetaqy tóleýge 244,1 mlrd teńge, onyń ishinde bazalyq zeınetaqy tóleýge 74,2 mlrd teńge, yntymaqty zeınetaqy tóleýge 169,9 mlrd teńge baǵyttaldy.
2022 jylǵy 1 qyrkúıekte bazalyq zeınetaqy tólemin eskere otyryp, zeınetaqy tólemderiniń ortasha mólsheri 109 224 teńgeni qurady.
Qyrkúıek aıynyń basynda Qazaqstandaǵy zeınetkerler sany 2 mln 253 myń adam.
«2018 jylǵy 1 shildeden bastap memlekettik bazalyq zeınetaqy tólemi árbir alýshyǵa onyń zeınetaqy júıesine qatysý ótilin eskere otyryp, jeke taǵaıyndalady. Bul rette 1998 jylǵy 1 qańtardaǵy jaǵdaı boıynsha yntymaqty júıede jumys istegen ýaqyty, sondaı-aq mindetti zeınetaqy jarnalary tólengen kezeńder zeınetaqy júıesindegi eńbek ótiline qosylady. Eger azamattyń zeınetaqy júıesindegi ótili 10 jyl nemese odan az bolsa, sondaı-aq eger múlde joq bolsa, bazalyq zeınetaqy eń tómengi kúnkóris deńgeıiniń 54 %-yn quraıdy, sodan keıin 10 jyldan asqan ár jyl úshin onyń mólsheri 2 %-ǵa artady. Mysaly, eger sizdiń ótilińiz 20 jyl bolsa, bazalyq zeınetaqy tómengi kúnkóris deńgeıiniń 74 %-yn, al 30 jyl bolsa, onda 94 %-yn quraıdy. Eńbek ótili 33 jyl nemese odan kóp bolsa, kúnkóris deńgeıiniń eń joǵarǵy mólsherinde belgilenedi», delingen mınıstrlik habarlamasynda.
Aıta ketsek, eger bir aı ishinde mindetti zeınetaqy jarnalary Biryńǵaı jınaqtaýshy zeınetaqy qoryna birneshe ret aýdarylsa, jınaqtaýshy júıege qatysý merzimi bir aıdy quraıdy.
Eńbek mınıstrliginde atap ótkendeı, mindetti zeınetaqy jarnalary qanshalyqty turaqty jáne tolyq kólemde tólense, zeınetaqy jasyna jetken kezde bazalyq zeınetaqy tóleminiń mólsheri de soǵurlym joǵary bolady.
