Parlament

* Saýal salmaǵy Aqyrtasty memlekettik jáne halyqaralyq deńgeıde júıeli zertteýge tıispiz Májiliste palata spıkeri Qabıbolla Jaqypovtyń tóraǵalyǵymen ótken jalpy otyrysta depýtat Aldan Smaıyl Premer-Mınıstr K.Másimovke depýtattyq saýal joldady. Onda bylaı delingen: «Ejelgi Taraz eskertkishteri» tarıhı-mádenı qoryq murajaıyna engen kóne jádigerler Qazaqstan men Ortalyq Azııanyń ǵana emes, adamzattyq mańyzǵa ıe qundylyqtar ekeni daýsyz. HI ǵasyrǵa tıesili Qarahan, Aısha bıbi, Babadja hatýn keseneleri men Shyǵys monshasy, Aqyrtas qalashyǵy qaraǵan jandy ári qýantady, ári kúrsindiredi. Qýantatyny – olar Uly Dala órkenıetiniń qaıtalanbas kórkem úlgileri. Kúrsindiretini – sol ǵajaıyptardyń qupııasy áli ashylyp bolǵan joq. Biz alys tarıhymyzdyń syryna tolyq qanǵymyz kelse, Aqyrtasty memlekettik jáne halyqaralyq deńgeıde júıeli zertteýge tıispiz. Taraz qalasynan shyǵysqa qaraı 40 shaqyrym júrseńiz, Aqsholaq temirjol beketine jetesiz. Oń qol jaqta Alataýdyń qarly bıikteri asqaqtaıdy. Solardyń saýyrynda qupııasy áli kúnge beımálim tas qala múlgip jatyr. Ol týraly bulyńǵyr boljam kóp. Osy jerde 1893 jyly bolǵan shyǵys­tanýshy Lerh Aqyrtasty býddalyq monas­tyrge telise, túrkolog Bartold nestorıandar kezeńiniń qurylysyna balaǵan. Nemis ǵalymy Brentes arab qolbasshysy Kýteıba saldyrǵan qorǵanǵa balaıdy. Ashyǵyn aıtaıyq, munyń bári – dereksiz joramal. Keıingi zertteýler Aqyrtas ertedegi Maııa úndisteriniń áıgili pıramıdalarymen tamyrlas degen tujyrym jasata bastady. Buǵan negiz joq emes. Tós tabanǵa jáne qabyrǵalarǵa qalanǵan tas bloktardyń árqaısynyń salmaǵy bir tonnaǵa jýyq. Olar tegistelip óńdelgen. Bir-birine geometrııalyq dál aralyqta kóterilgen tas baǵanalar Afınadaǵy Akropoldardyń silemin kózge elestetedi. Rım Kolızeıiniń sáýletine tán belgilerdi de ańǵarasyń. Osyndaı uqsastyq – b.d.b. I ǵasyrlarda Ǵun qaǵany Chjan Chjın nemese Shóje Rım legıonerleri men Parfııa sheberlerine Talas, ıaǵnı Taraz qalasyn saldyrǵanda, Aqyrtasty da birge kótergen joq pa eken degen oıǵa bóktiredi. Asylynda, bul oı shyndyqqa jaqyn. Túıip aıtsaq, Aqyrtasqa IýNESKO-nyń nazaryn aýdaryp, osy bedeldi uıymnyń qorǵaýyna aldyrýǵa tıispiz. Sizden, qurmetti Kárim Qajymqanuly, osyǵan yqpal etýdi ótinemiz. Sondaı-aq, Aqyrtasty zertteýge halyqaralyq arheologııa ortalyqtaryn tartý qajet. Sebebi, tas qalanyń tarıhy tym árige ketedi, onyń qupııasy sonda ǵana ashylady. Aqyrtasqa búginde kelýshiler kóp, respýblıkanyń shartarabynan, shetelderden arnaıy atbasyn burýshylar da az emes. Olar qonatyn úı respýblıkalyq bıýdjet arqyly salynypty. Munda zertteýshiler májilis quratyn oryn da bar. Qazirge jetpeı turǵany eki nárse: Aqyrtasqa Batys Eýropa – Batys Qytaı magıstralinen 8 shaqyrym asfalt jol tartý kerek. Sodan keıin sýmen qamtamasyz etetin skvajına qazyp bersek, ejelgi arheologııa eskertkishi kóptiń ıgiligine aınalady, Tarazda týrızmniń damýyna yqpal etedi. Bul tilek-usynystar bizdiń ǵana emes, qarııa tarıhtyń ótinishi dep bilińiz». * Depýtat daýysy

Sý mólsherin qadaǵalaýdaǵy utymdy qadamdar

«Qazaqstan Respýblıkasynyń Úkimeti men Qytaı Halyq Respýblıkasynyń Úkimeti arasyndaǵy Qorǵas ózeninde «Dostyq» birlesken ortaq sý torabyn salýdaǵy yntymaqtastyq týraly kelisimdi ratıfıkasııalaý týraly» Qazaqstan Respýblıkasy zańynyń jobasy boıynsha paıym. Jaqynda Parlament Senaty «Qazaqstan Respýblıkasynyń Úkimeti men Qytaı Halyq Respýblıkasynyń Úkimeti arasyndaǵy Qorǵas ózeninde «Dostyq» birlesken ortaq sý torabyn salýdaǵy yntymaqtastyq týraly kelisimdi ratıfıkasııalaý týraly» zań jobasyn qabyldady. Zańnyń maqsaty transshekaralyq Qorǵas ózeninde «Dostyq» birlesken ortaq sý torabynyń qurylysy máselelerin retteý bolyp tabylady jáne bul baǵyt elimizdiń sý resýrstaryn paıdalaný men qorǵaý baǵytyndaǵy strategııasyna sáıkes keledi. Qazaqstan Respýblıkasynyń Prezıdenti Nursultan Nazarbaevtyń «Qazaqstan-2050» Strategııasynda: «Álemdik sý resýrstary da qatty qysym kórip otyr. Sońǵy 60 jylda Jer sharynda aýyzsýdy paıdalaný 8 ese ósti... Sý – barynsha shekteýli resýrs jáne onyń kózderin ıelený úshin kúres jer betindegi shıelenis pen janjaldar sebepteriniń biri retinde qazirdiń ózinde geosaıasattyń asa mańyzdy faktoryna aınalyp otyr... Qazirdiń ózinde biz transshekaralyq ózenderdiń sý resýrs­taryn paıdalanýda birqatar máselelermen betpe-bet keldik», dep atap kórsetýi sý resýrstaryn tıimdi paıdalaný men qorǵaýdyń el ekonomıkasy úshin asa zor strategııalyq mańyzy bar ekendigin aıǵaqtaıdy. Qorǵas ózeni Balqash kóli basseınine jatady, Ile ózeniniń oń saǵasy bolyp tabylady. Qorǵas ózeni 1881 jyldan bastap Reseı ımperııasy men Sın ımperııasynyń arasyndaǵy birinshi shekaralyq ózen bolyp eseptelip, keıin Keńes Odaǵy men Qytaı Halyq Respýblıkasy (ári qaraı – QHR), al 1991 jyldan, Qazaqstan táýelsizdik alǵan kezeńnen beri, Qazaqstan men QHR arasyndaǵy shekaralyq ózen bolyp otyr. Qorǵas ózeni Jońǵar Alataýy men Borohoro jotalarynyń qıysqan jerinde Qazaqstan Respýblıkasynyń Almaty oblysy aýmaǵynan bastalady. О́zenniń uzyndyǵy 180 shaqyrymǵa jýyq, onyń ishinde 160 shaqyrymǵa jýyǵy Qazaqstan men QHR arasyndaǵy shekara bolyp tabylady. Qorǵas ózeni keń jáne sel qaýipti alqapty qalyptastyryp, ońtústikke qaraı perpendıkýlıarly aǵady. Selderdiń kózderi negizinen kóptegen jotadaı kólder, olardyń eń tanymaly №2 Qapqan dep atalady. Keńes dáýirinde taraptar Qorǵas ózeniniń sý resýrstaryn tómendegi qujattar negizinde teń úleste bólip otyrǵan: - 1965 jylǵy 30 sáýirdegi Qorǵas ózeniniń sýyn bólý týraly kelisim; - 1975 jylǵy 26 qarashadaǵy Qorǵas ózenindegi sýdy bólý boıynsha birlesken keńes-qytaı komıssııasynyń jumysy týraly hattama; - 1983 jylǵy 15 sáýirdegi Qorǵas ózeniniń joǵary aǵysyndaǵy sýdy bólý týraly hattama. Ol jyldary sýdy bólý aýyr tehnıka kómegimen júzege asyrylǵan. Jaz aılarynda, ózende sý kóp bolǵan kezde sýdy bólý óte qıyn bolǵan. Kúrdeli gıdrotehnıkalyq ǵımarattyń bolmaýyna baılanysty árbir tarap sý alýdy, óz muqtajdyǵyna eskere otyryp, jeke-jeke júzege asyrdy, sol sebepti de sýdyń naqty esebi bolǵan joq. Osyǵan baılanysty, 1991 jyly Qazaq­stan Úkimeti atynan QHR-diń Shyńjan Uıǵyr avtonomııaly aýdanynyń sý sharýa­shylyǵy mınıstrine Qorǵas ózeninde sý torabynyń qurylysyn salý týraly hat jold­andy. 1992 jylǵy qarasha aıynda Almaty qalasynda osy másele boıynsha taraptar sarapshylarynyń kezdesýi ótti. Osy kezdesý barysynda taraptar birlesken sý torabyn salý týraly ýaǵdalastyqqa qol jetkizdi. Biraq ta sol kezdegi ekonomıkalyq qıynshylyqtarǵa baılanysty bul jumystar ýaqytsha toqtatyldy. 2002 jyldan bastap bul jumystar qaıtadan jandanyp, sol jyldyń 28 tamy­zynda Qazaqstan Respýblıkasynyń Pan­fılov ýchaskesi boıynsha jáne QHR-diń Shyńjan Uıǵyr avtonomııaly aýdanynyń Ile okrýgi boıynsha Qorǵas ózeniniń sýyn paıdalaný men bólý týraly kelisimge jáne birlesken baqylaý ko­mıs­sııasynyń hattamasyna qol qoıylyp, eki tarap ókilderinen birlesken komıssııa quryldy. Osy komıssııanyń qajyrly jumystary nátıjesinde 2005 jyldan jobalaý jumystary bastaldy. Alaıda, sý toraby qurylysy boıynsha túpkilikti ýaǵdalastyqqa tek 2008 jyldyń qarasha aıynda Almaty qalasynda ótken Trans­shekaralyq ózenderdi paıdalaný jáne qorǵaý jónindegi Qazaqstan-Qytaı birlesken komıssııanyń otyrysynda qol jetkizildi. 2010 jyldyń 13 qarashasynda Qaraǵandy qalasynda transshekaralyq ózenderdi paıdalaný jáne qorǵaý boıynsha Qazaqstan-Qytaı birlesken komıssııanyń 8-shi otyrysynda Qazaqstan Respýblıkasynyń Úkimeti atynan Qazaqstan Respýblıkasy Aýyl sharýashylyǵy mınıstri Qorǵas ózenindegi «Dostyq» birlesken sý toraby qurylysyn salýdaǵy yntymaqtastyq týraly kelisimge qol qoıyldy. Sý toraby qurylysy 2011 jyldyń mamyrynda bastalyp, 2013 jyldyń 5 maýsymynda Qorǵas ózenindegi «Dostyq» birlesken sý torabyn paıdalanýǵa berýdiń saltanatty ashylýy ótkizildi. Bul «Dostyq» birlesken ortaq sý toraby Qazaqstan men Qytaı memleketteriniń transshekaralyq Qorǵas ózeni sý resýrs­taryn teńbe-teń paıdalanýǵa múmkindik beredi, eki eldiń sáıkes qyzmet atqarýshy mekemeleri avtomattandyrylǵan júıe arqyly Qorǵas ózeninen ár taraptyń alǵan sý mólsherin qadaǵalap otyrady, sýdy tıimdi paıdalaný boıynsha týyndaǵan máselelerdi ózara kelisim negizinde jedel sheshýge qol jetkizedi. Sý toraby ashylǵannan beri, 2013 jyldyń shilde-qarasha aılarynda ár tarap Qorǵas ózeninen 120,8 myń tekshe metr sý alyp, óz qajettikterine jaratqan. Bul rette, Qytaı memleketi tarapynan alynǵan sý Shyńjan-Uıǵyr avtonomııaly aýdanyndaǵy egistik jerlerdi sýlandyrýǵa baǵyttalsa, Qazaqstan alǵan sý kólemi Almaty oblysynyń Panfılov aýdanynyń 16 myń gektar egin alqaptaryn sýarýǵa jumsalýda. Bolashaqta transshekaralyq ózenderdi birlesip ortaq paıdalaný jónindegi jumystar Qytaı Halyq Respýblıkasymen odan ári jalǵasyn tabady degen josparlar bar, atap aıtqanda, Sý resýrstary komıtetimen Shyǵys Qazaqstan oblysynyń Úlken-Ulasty, Almaty oblysynyń Súmbe ózenderinde osyndaı sý toraptaryn salý jóninde izdestirý-jobalaý jumystary júrgizilip jatyr. Bul jumystar, sóz joq, qazirgi álemde sý qorynyń tapshylyǵy, sýdy paıdalaný máseleleri úlken problemaǵa aınalyp otyrǵan kezde, Memleket basshysynyń transshekaralyq ózenderdi tıimdi paıdalaný jónindegi tapsyrmalaryn oryndaý baǵytyndaǵy is-qımyldarǵa sáıkes keledi. Murat BAQTIIаRULY, Senat depýtaty. *Sizdi ne tolǵandyrady?

Balalardyń jazǵy demalysyna bas aýyrtpaýdy doǵaraıyq

Mine, jazǵy kanıkýl kezeńi de jaqyndap qaldy. Al balalar men jasóspirimderdiń jazǵy demalysy men ispen aınalysýyn uıymdastyrý máselesi búgingi tańda anaǵurlym ózekti áleýmettik problemalardyń biri bolyp otyr.

Tipti, Bilim jáne ǵylym mı­nıstrliginiń resmı derekteri boıynsha oqýshylardy uıymdas­tyrylǵan jazǵy demalys túr­lerimen qamtý deńgeıi tómendep keledi. Mysaly, 2010 jyly ol 92,7 paıyzdy, 2012 jyly 91,4 paıyzdy quraǵan. Biraq, teksere kele, bul sandar da óte joǵary ekenine kóz jetedi, óıtkeni, balalardyń qysqa ýaqyt bolatyn mektep janyndaǵy lagerlerin uıymdastyrý olardyń jazǵy kanıkýl kezeńinde demalysyn, bos ýaqyty men bir ispen aınalysýyn uıymdastyrýdyń negizgi baǵyty bolyp qalýda. Ony­men tek tómengi synyp oqý­shy­lary qamtylady jáne de kóbi­nese tamaqtandyrýsyz, demalys úshin qajetti jaǵdaılarsyz uıymdastyrylady, sondaı-aq, joǵary synyp oqýshylary jınaý jáne mekteptiń jańa oqý jylyna daıyndalý boıynsha eki aptalyq praktıkamen qamtylady. Kezinde jekeshelendirilgen kóptegen balalar lagerleri qazir­gi tańda maqsatty paıdalany­lyp otyrǵan joq, jumys istep tur­ǵandary – qaldyq qaǵıdaty boıynsha ustalynýda, solardyń ózine de joldama quny qymbat bolǵandyqtan, jaǵdaıy osal, kópbalaly otbasylardaǵy bala­lardyń basym kópshiligine qol jetkizý ekitalaı. Jazǵy eńbek toqsanynda balalar men jasóspirimderdi eń­bek­ke tárbıeleýdiń eń jaqsy dás­túr­leri, ókinishke qaraı, joıylyp, búginde ony jandandyrý, eńbek pen demalys lagerlerinde, joǵary sy­nyp oqýshylarynyń eńbek otrıad­tarynda, oqýshylardyń ón­diris brıgadalarynda, mektep ormanshylyǵynda eńbek daǵ­dy­lary­na baýlý máselesimen, jalpylaı aıtqanda, eshkim aınalyspaıdy. Balalar men jasóspirimderdi jazǵy kezde saýyqtyrý, mem­lekettik-jekemenshik áriptestikti damytý, múddeli ortalyq, jer­gilikti organdardyń kúsh-jigerin úılestirý boıynsha júıeli uıym­dastyrýshylyq jumys mektepterden eriksiz aqparat jınaýmen shektelse, bul naqty jaǵdaı­dy kórsetpeıdi. Is júzinde oqýshy­lardyń negizgi bóligi jazǵy kezde ózderimen ózderi bolady. Buǵan qosa, otbasy ınstıtýtynyń b­á­s­e­ń­sýine baılanysty, balalarmen jáne jasóspirimdermen tárbıe jumysy, olardyń jazǵy kezeńdegi beıáleýmettik júris-turysynyń aldyn alý sharalary joqqa shyǵarylady. Joǵaryda baıandalǵannyń negizinde tıisti ortalyq jáne jergilikti atqarýshy organdarǵa qalyptasqan jaǵdaıdy zerdeleý qajet. Onyń ishinde myna máselelerge nazar aýdarylýy tıis dep bilemiz. Birinshiden, jazǵy kanıkýl kezinde balalar men jasóspirimder demalysynyń, saýyqtyrylýynyń jáne ispen aınalysýynyń júıe­li monıtorıngin júrgizý jáne baqylaý tájirıbesine qaı­typ oralý kerek. Ekinshiden, jeke­shelendirilgen jáne basqa qyzmet túrine qaıta baǵdarlanǵan lager­lerdi qaıtarý, jumys iste­meı turǵan lagerlerdi qalpyna kel­tirý esebinen balalardy saýyq­ty­rýǵa arnalǵan saýyqtyrý meke­meleriniń, baldyrǵandardy ońaltý profılaktorııleriniń jelisin damytý jónindegi arnaıy («Baspana» baǵdarlamasyna uqsas) baǵdarlama qabyldaý múmkindigin qarastyrý qajet. Úshinshiden, jazǵy kezde joǵary synyp oqýshylarynyń ispen aınalysýyn qamtamasyz etý, olardyń densaýlyǵyn nyǵaıtý maqsatynda jazǵy eńbek toqsanyn jandandyrý boıynsha sharalardy iske asyrý kerek. Buǵan qosa, jalǵa alynǵan lagerlerde túrli konfessııa ókilderiniń balalar demalysyn uıymdastyrý oqıǵalaryna baılanysty qaladan tys lagerlerdiń qyzmetin baqylaýdy kúsheıtý máselesin qarastyrǵan jón. Sondaı-aq, balalardyń sýdaǵy qaýipsizdigi máselesin pysyqtaý, úlken sýda qutqarý stansııalaryn qurý máselesin pysyqtaý, olardy súńgý quraldarymen, jaǵajaı aımaqtarymen jabdyq­taý qajet. Onyń ishinde bilikti psıholog-pedagogıkalyq, sport-deneshynyqtyrý kadrlaryn, medısınalyq mamandardy daıarlaý problemasyn sheshý, lager jaǵdaıynda balalarmen jumys isteý úshin aǵa jáne otrıad bastaý­shysy mektebi júıesin qaıta qalpyna keltirý kerek. Sonymen qatar, Qazaqstan tarıhyn zerdeleýde balalardyń oı-órisin keńeıtý, qyzyǵýshylyǵyn týdyrý, ekskýrssııalyq qyzmet túrin, ishki týrızmdi damytý maqsatynda jazǵy saýyqtyrý lagerlerinen kelgen balalardyń uıymdasqan toptary Astanadaǵy, oblys ortalyqtaryndaǵy, ký­rorttyq aımaqtardaǵy mura­jaılarǵa, oıyn-saýyq orta­lyqtaryna barǵan kezde olar úshin tegin kirý bıletteri máselesin qarastyrý jaıy oń sheshilse, utyl­maıtynymyz anyq. Qoryta aıtqanda, balalar­dy saýyqtyrý demalysyn, jasós­pirimderdiń jazǵy eńbek toqsanynda ispen aınalysýy júıesin damytý óskeleń urpaqtyń densaýlyǵyn anaǵurlym jaqsartýǵa jáne kóptegen problemalardan qutylýǵa múmkindik beredi. Maıra AISINA, Májilis depýtaty. * Iskerlik issaparlary

Grekııada dinı jıyn ótti

Qazaqstan Respýblıkasy Parlamenti Májilisiniń depýtaty, Ekologııalyq máseleler jáne tabıǵat paıdalaný komıtetiniń tóraǵasy Aleksandr Mılıýtın Grekııadan oraldy. Ol atalǵan eldiń Solonıkı qalasynda uıym­dastyrylǵan Pravoslavtardyń Parlamentaralyq Assambleıasynyń tóraǵalar men halyqaralyq hatshylar komıssııasynyń otyrysyna qatysty. Basqosý sheńberinde «Hrıstıandyq – pravoslavıe jáne buqaralyq aqparat quraldary» degen taqyrypta semınar-konferensııa ótti, dep habarlady Májilistiń baspasóz qyzmeti. *Talqylaý taǵylymy Elektr qýaty tutynýshyǵa jetkenshe onyń quny nege shekten tys sharyqtap ketedi? Májilistiń sońǵy jalpy otyrysynda osy máselege qatysty zań jobasy birinshi oqylymda qaralyp, qyzý talqylandy. Zań jobasynyń ózi keıbir zańnamalyq aktilerge elektr energetıkasy nysandarynyń jumysyn baqylaýdy jáne qadaǵalaýdy uıymdastyrý máseleleri boıynsha ózgerister men tolyqtyrýlar engizý týraly dep atalsa da, talqylaý barysynda elektr qýatyna baılanysty talaı tolǵaqty máselelerdiń basy shalyndy. Máselen, depýtat Raýan Shaekın búgingi kúni elektr qýatyn óndiretin kásiporyndar 1 kvt-saǵatty 8 teńgeden óndirse, ol tutynýshyǵa jetkende 20 teńgege deıin bir-aq kóteriletinin aıta kelip, munyń mán-mánisi nede ekenine toqtaldy, ıaǵnı ol qymbattaýdyń naq­ty sebepterin de ashyp berdi. Ha­lyq­qa elektr qýatyn jetkizetin kásip­oryn­dar úsh satydan turady eken: ón­dirýshi; tasymaldaýshy; jabdyq­taý­shy. Biz óndirýshi men elektr qýatyn tasymaldaıtyndardyń tarıfin mono­polııaǵa qarsy kúres týraly zańmen shekten shyǵarmaımyz. Alaıda, tu­ty­ný­­­shyny elektr qýatymen tikeleı jab­dyqtaıtyn kásiporyndardyń 80 paıyzdyq áreketin atalmysh zańmen retteı almaı otyrmyz, deı kelip, báleniń bári osy jerde ekenin atap kórsetti. Bizdiń osy zańymyzdyń álsizdiginen tutynýshyǵa jetkende elektr qýaty­nyń baǵasy aspandap ketip tur. Sonyń arqasynda, tarıfterdi oılaryna kelgen kólemge deıin kóterip otyrǵan elektr qýatymen jabdyqtaıtyn kásiporyndar shekten shyǵyp ketken kólemde tabys tabýda dedi ol. Osylaı degen depýtat osy jerde monopolııaǵa qarsy kúres agent­ti­giniń tekseris anyqtamasynyń qorytyndysynan my­saldar keltirdi. Mysaly, «Astanaenergosbyt» JShS osy jol­men 2012 jyly 344 mln., al 2013 jyldyń alǵashqy jartysynda ǵana 1 mlrd. 43 mln. teńge tys tabys tapqan. R.Shaekın osynyń bári atalmysh kásiporyndardyń múddesine lobbı jasalyp otyrǵannyń saldary ekenin ashyp aıtty. Jáne ol bir jyl emes, 8 jylǵa sozylyp otyrǵan is, eger biz osy máselede saıası sheshim qabyldaı almasaq, bári de óz ornynda qala beredi, dedi depýtat. Sóziniń sońynda R.Shaekın myna zań jobasynyń da tıimdi bolaryna kúmán keltirdi. Ekinshi oqylymda úkimettik nusqaǵa «umytyp» ketken qosymshalarynyń bári engiziletini kesteden kórinip tur, sóıtip, bul zań jobasy óziniń baqylaý men qadaǵalaý úshin jasalyp otyrǵandyǵynan múlde aýytqyp keterine senimdimin. Ondaıǵa aıtatyn sebepter de daıyn turady. Bireýleri biz shetelderge satamyz dep kergıdi, taǵy bireýleri taǵy da basqa sebepter tabady. Sondyqtan ekinshi oqylymǵa deıin tasymaldaý men jabdyqtaý máselesine birdeı qaraý jóninde oılanaıyq, dep qorytty ol óziniń sózin. Al depýtat Shavhat О́temisov qýat óndiretin jáne tasymaldaıtyn uıym­darǵa ýaqytsha basqarý ınstıtýtyn engizý týraly normanyń túp ornymen qate ekenin jetkizdi. Bul jańa ózgeris túpkilikti oılastyrylmaǵan, ony oryndaý jáne iske asyrý tetigi de naqtylanbaǵan. Sonymen birge, ol árbir jekemenshik sýbektilerdiń nesıelik jáne qaryzdyq mindettemeleri bolatynyn eskermegen. Mundaı mindettemelerdi jarty jylǵa qalaı toqtatýǵa bolady? Al eger ýaqytsha basqarý kezinde elektrstansanyń negizgi jabdyqtaryna nuqsan kelse she? Onyń shyǵynyn kim óteıdi? О́kinishke qaraı, zań jobasy, mine, osyndaı máselelerdi esepke almaǵan, dedi ol. Sondaı-aq, ol zań jobasynyń normalary bıznes-qaýymdastyqtyń sarap qorytyndysyn almaı engizilgenin de synady. Zań jobasy ekinshi oqylymǵa usynylǵanda atalǵan syndar túzetiler degen úmitpen depýtattar biraýyzdan maquldady. Jaqsybaı SAMRAT, «Egemen Qazaqstan».

Fotokúndelik

Sýretterdi túsirgen Erlan OMAROV.