Qazaqstan Respýblıkasy Prezıdentiniń kezekten tys saılaýy ótetinin Memleket basshysy 1 qyrkúıektegi Joldaýynda málimdegen edi. Keshe Qasym-Jomart Toqaev Qazaqstan halqyna úndeýin jarııalady. Onda «Osy bastama jarııalanǵannan beri bir aıǵa jýyq ýaqyt ótti. Bul – barlyq máseleni baıyppen talqylap, jaǵdaıdy baǵamdaýǵa jetkilikti merzim.
Halyq bizdiń saıası júıeni ózgertý týraly josparymyzdyń mán-mańyzyn jaqsy túsinip otyr. Sondyqtan men búgin buǵan deıin aıtylǵan saılaýdyń merzimine jáne Konstıtýsııanyń talaptaryna sáıkes kezekten tys Qazaqstan Respýblıkasy Prezıdenti saılaýyn 2022 jylǵy 20 qarashada ótkizý týraly Jarlyqqa qol qoıdym.
Bul naýqan eldiń búkil saıası júıesin túbegeıli ózgertetin saılaý kezeńin bastap beredi. Sol arqyly ekonomıkany turaqty damytýdy, halyqtyń ál-aýqatyn arttyryp, turmys sapasyn jaqsartýdy kózdeıtin uzaqmerzimdi mindetterdi júzege asyrýǵa múmkindik týady», dep málimdedi.
Shynynda da, jalpy alǵanda qoǵamdyq talqylaý ótkizýge jáne aldyn ala daıyndyq jasaýǵa bul ýaqyt jetkilikti. Al buǵan deıingi saıası dástúr boıynsha kezekten tys saılaýdyń ýaqytyn jarııalaý men Jarlyqqa qol qoıý bir kúnde bolatyn. Sonymen qatar Prezıdent aldaǵy Parlament saılaýynyń ýaqytyn kem degende alty aı buryn jarııalady. Bul barlyq saıası kúshtiń aldaǵy Parlament pen máslıhat saılaýlaryna daıyndalýǵa jetkilikti ýaqyty bar degendi bildiredi.
Saıası turǵydan saraptap qarasaq, bul saılaýdyń bolatyny anyq edi. Dál 20 qarashaǵa dóp kelýi prezıdenttik saılaý zańdylyqtarynyń ýaqyt sheńberine baılanysty dep esepteımin. Saıası partııalar, basqa da belsendiler saılaýaldy baǵdarlamalaryn pysyqtaýyna, úmitkerlerdi ózara irikteýge bir aı ýaqyt berildi dep túsinse bolady. Endi naqty úmitkerler usynylady. Memleketimizdiń turaqty, álemdik shıelenisterge daıyn bolý maqsatynda osyndaı qarqyndy júıe kerek.
Qarashadaǵy saılaý álem qubylyp, geosaıası qaýipsizdik mańyzdy máselelerdiń birine aınalǵan kezeńde ótedi. Bul saılaýdyń tarıhı mańyzy – eń kóp daýys jınaǵan úmitker Prezıdent laýazymynda bir márte ǵana otyra alatynynda. Al jetijyldyq merzim turaqtylyqtyń arqasynda reformany iske asyrýǵa múmkindik beredi.
Ádil SAILAÝBEK,
qoǵam qaıratkeri
