Gaýhardyń samyrsyn kúbisi

Bıyl «Jumyspen qamtý-2020 jol kar­tasy» baǵdarlamasynyń aýyldaǵy kásip­ker­likti damytý jónindegi ekinshi baǵyty boıynsha nesıe alýǵa tórt birdeı múmkindigi shekteýli jan ótinish berdi. Solardyń biri – Jánibek aýylynyń tur­ǵyny Gaýhar О́tegenova. Ol byltyr Reseıdiń Sankt-Peterbýrg qalasynan óz qarjysyna «Kedrovaıa bochka» (samyrsyn kúbi) aldyryp, shaǵyn saýna arqyly úıinen emdeý qyzmetin kórsetip kelgen bolatyn. Bul – emdeý-saýyqtyrý baǵytynda aýdanda buryn-sońdy bolmaǵan tyń kásip. Gaýhardyń kúbisi kólemi yqsham, tek bir adamnyń túsýine arnalǵan. Samyrsyn kúbige túsken jannyń aǵzasy tazaryp, sharshaǵany basylady, júıke jáne qan-tamyrlary júıesin qalpyna keltirip, nyǵaıtýǵa kómektesedi. Orys monshasynyń barlyq qundylyǵymen berik baılanysqan samyrsyn kúbiniń (fıtobochka) adam aǵzasyna budan basqa da paıdaly jaǵy kóp. Gaýhar bastaǵan kásibiniń tıimdiligi men tabysyn arttyrý maqsatynda jýyrda aýdan ortalyǵyndaǵy M.Yqsanov atyndaǵy kósheden bir ǵımaratty jalǵa alyp, samyrsyn kúbisin osynda ornalastyrypty. – Bıyl baǵdarlamaǵa sáıkes 1 mıllıon teńge nesıe alamyn. Bul qarjyǵa oń-tústikkoreıalyq sylap, ýqalap emdeýge (massaj) arnalǵan kereýet pen ústel satyp alyp, kásibimdi odan ári jetildirmekpin, – deıdi kásipker óz sózinde. Nurymbek JAPAQOV. Batys Qazaqstan oblysy.