Sýretti túsirgen Erlan OMAR, «EQ»
Buǵan deıin jasampazdyqqa bastaıtyn kóptegen ıdeıa, joba aıtyldy. Ony iske asyrý úshin dúmpý qajet bolǵandaı áserde júrgen edik. Saılaýdan keıin el kútken jańashyldyqtar bolyp, elimiz damýdyń jańa satysyna kóteriledi dep esepteımin.
Qazirgideı geosaıası ahýal shıelenisken ýaqytta, atap aıtsaq, Qarabaq máselesi, Taıvan problemasy, qyrǵyz-tájik, orys-ýkraın arasyndaǵy qaqtyǵystar týyndaǵan kezeńde bilikti dıplomat, kásipqoı maman memleketimizdiń abyroıyn asqaqtatyp, halyqtyń júregine senim uıalatýy kerek.
Saılaý oıdaǵydaı ótse, Úkimettiń aýysýyn kútemin. Sebebi halyqtyń, qoǵamnyń, tipti Memleket basshysynyń kóńili tolmaıtyn dúnıeler kóp. Jańadan bastalǵan «dáýir», ıaǵnı jetijyldyq kezeńniń jospary basqa kóshbasshylardyń bılikke kelýimen júzege asady.
Prezıdent ózi aıtqandaı, jeti jyl kez kelgen reformany qolǵa alyp, nátıjeli aıaqtaýǵa jetkilikti ýaqyt. Bul aralyqta áleýmettik problemalar, atap aıtsaq, jol máselesi sııaqty aýqymdy problemalar óz deńgeıinde sheshiledi degen senim mol.
Aldaǵy saılaýda prezıdent jetijyldyq merzimge saılanbaq. Osy oraıda, 7 sany qazaq úshin kıeli ekenin aıta ketken jón. О́zderińizge málim, halqymyzda jeti qazyna, jeti ata, jeti qat kók sekildi qasterli uǵymdar bar. Jańbyrdan keıin jarqyrap shyǵatyn kempirqosaqtyń da túsi jeteý.
Budan qala berdi, «Jeti jurttyń tilin bil» degendi jattap ósken urpaqpyz. Qazaq handyǵy kezinde «Jeti jarǵy» zańdar jınaǵy qabyldandy. Aptada 7 kún bar. Túngi aspanda adasqanǵa jol siltep Jetiqaraqshy tur. Qulaqtyń quryshyn qandyratyn aspap ta jetigen dep atalady. Qysqasy, prezıdenttik merzimdi 7 jyl dep tańdaýdyń osyndaı bir rámizdik máni bar.
Samat NURTAZA,
saıasattanýshy
