Eńbek jáne halyqty áleýmettik qorǵaý vıse-mınıstri Oljas Ordabaev baıandamasynda bul zań jobalarynyń negizgi maqsaty ulttyq biliktilik júıesiniń elementterin júıeleý, biliktilik júıesin basqarý modelin engizýdi qamtamasyz etetin quraldar men mehanızmderdi qalyptastyrý ekenin atap ótti.
Ulttyq biliktilik júıesin engizý boıynsha sharalardy Eńbek jáne halyqty áleýmettik qorǵaý mınıstrligi Ǵylym jáne joǵary bilim, Oqý-aǵartý mınıstrlikterimen, «Atameken» ulttyq palatasymen birlesip atqardy.
– Zań jobasyna sáıkes memlekettik organdar janynan kásiptik biliktilik jónindegi salalyq keńester qurylyp, kásiptik biliktilikterdi rastaýdy qajet etetin kásipter tizbesi aıqyndalady. Ol mınıstrliktiń Ulttyq biliktilik júıesiniń sıfrlyq platformasynda júzege asyrylady, – dedi O.Ordabaev.
Zań jobasy qabyldansa, súıikti isin kásipke aınaldyrǵan mamandarǵa biliktiligin resmı túrde rastaıtyn kýálik beriledi. Biliktilik júıesi qyzmetkerlerdiń, jumyssyz mamandardyń neǵurlym tez ári sapaly jumysqa ornalasýyna, joǵary tabys tabýyna múmkindik beredi.
Al jumys berýshilerge eńbek naryǵynyń zamanaýı talaptaryna saı bilikti mamandardy jumysqa tartýǵa, eńbek ónimdiligin arttyrýǵa jol ashady.
