Pavlodar oblysyna jumys saparymen kelgen Energetıka mınıstri Bolat Aqsholaqov «B.Nurjanov atyndaǵy Ekibastuz 1-MAES» JShS-de boldy.
Kásiporynnyń bas dırektory Erjan Ertaev jyl saıyn elektr energııasyn óndirý kólemi artyp jatqanyn atap ótti.
- 2021 jyly 22,8 mıllıard kıloVatt elektr energııasy óndirildi. Bul sońǵy 35 jyldaǵy rekord. Buǵan deıin bundaı kórsetkish 1986 jyly bolǵan, - dedi Erjan Ertaev.
Qazir 1-MAES-te №3, 4 jáne 6 energoblokta aǵymdaǵy jóndeý jumystary aıaqtaldy. Odan bólek, kestege sáıkes №2 energoblokta kúrdeli jóndeý, №7 jáne 8 blokta aǵymdaǵy jóndeý júrgiziledi.
Sonymen qatar, Erjan Ertaev qazir №1 energoblokty qalpyna keltirý jumystary atqarylyp jatqanyn atap ótti.
- Bul Qazaqstandaǵy eń kóp elektr óndiretin stansııa bolmaq. Jalpy ınvestısııa kólemi - 162 mıllıard teńge. Bundaǵy jumystar 2012 jyly bastalǵan. 2023 jyldyń jeltoqsanynda aıaqtalady. Jobanyń maqsaty – qýattylyqty 4 myń kıloVattqa deıin jetkizý. Biraq joba toqtatylyp, 2021 jyly smetalyq-qujattamasyna ózgerister engizildi. Qazir kestege túzetýler engizilgen. Jyl sońyna deıin kesteni qýyp jetemiz degen oıdamyn, - dedi Erjan Ertaev.
Mınıstrliktiń atomdyq jáne energetıkalyq qadaǵalaý men baqylaý komıtetiniń tóraǵasy Suńǵat Esimhanov joba nelikten toqtaǵanyn aıtty.
- Sol kezde mınıstrlikpen ınvestısııa boıynsha kelisim bolmady. Biraq mınıstrliktiń uıǵarýymen jumys 2024 jyly aıaqtalýy kerek bolǵan. Keıin 1 jylǵa ilgeriletildi, - dedi Suńǵat Esimhanov.
Bas dırektor qazir №1 energoblok boıynsha máseleler joq ekenin jáne materıaldar men qarjy bar ekenin atap ótti.
Qurylys jumystary barysynda 500 jumys orny ashyldy. Al, stansııanyń iske kiriskende shtatta barlyǵy 1443 adam jumys isteıdi.
