Bul kúnderi Fedorovtyń asqan sheberligine tánti bolǵan barlyq BAQ ókilderi onyń osy jarqyn jeńisi jaıynda jarysa jazyp jatyr. Rasynda da, jerlesimizdi qalaı maqtasaq ta jarasady. О́tkenge zer salsaq, qazaqstandyq sportshylar arasynan álemdik dodalarda tek Alekseı Lýsenkonyń ǵana baǵy janǵanyn baıqaımyz. 2012 jyly Nıderlandtyń Lımbýrg qalasynda ótken dodada otandasymyz aldyna jan salmaı, bas júldeni oljalady. Mine, endi araǵa 10 jyl salyp, Evgenıı Fedorov álem chempıony atanyp otyr. Osy oraıda, ár jyldary dál osy anderler saıysyna qatysqan Dmıtrıı Fofanov, Andreı Kashechkın, Maksım Iglınskıı, Andreı Zeıs, Roman Kıreev jáne taǵy basqa myqty veloshabandozdarymyzdyń júldesiz qalǵanyn eskergen jón. Osy jaıttyń ózi-aq, Fedorovtyń alystaǵy Aýstralııada úlken sharýa tyndyrǵanyn ańǵartyp tur.
Báseke aıaqtalǵan bette: «Jasyl qurlyqtaǵy jarysqa tyńǵylyqty daıarlandyq. Sol úshin de osydan birer apta buryn ǵana aıaqtalǵan «Ispanııa Výeltasyna» qatysyp, sheberligimdi ábden shyńdadym. Biraq sonyń ózinde de bas júldeni oljalaımyn dep esh oılaǵan joq edim. О́ıtkeni bul birinshilikte básekelestik óte joǵary. Qyrsyqqanda sol kúni jańbyr da jaýa qaldy emes pe. Bul jaǵdaı biraz qolaısyzdyq týdyrdy. Soǵan qaramastan jarys jolynda barymdy saldym. Nátıjesin ózderińiz de kórip otyrsyzdar. Meniń qýanyshymda shek joq!», dep aqtaryla sóıledi.
Evgenıı Fedorov jaıynda taǵy biraz málimet beretin bolsaq, ol buǵan deıin de birqatar dúbirli dodalarda daralanǵan. Atap aıtsaq, 2018 jyly Býenos-Aıreste alaýy tutanǵan jasóspirimderdiń Dúnıejúzilik Olımpıadasynda jeńis tuǵyrynyń eń bıik satysyna kóterildi. Eresekterdiń Azııa chempıonatynda altyn men kúmis medaldardy ıelendi. Sondaı-aq Evgenııdiń Qazaqstan chempıony degen ataǵy bar.
