Elimizde ónerkásiptik damý boıynsha komıssııa quryldy

ASTANA. 18 mamyr. Indýstrııalyq-ınnovasııalyq damý baǵdarlamasy aıasynda Úkimet basshysy Kárim Másimovtiń basshylyǵymen ónerkásiptik damý boıynsha komıssııa jumys isteıtin bolady. Ol memlekettik organdar men ulttyq holdıngterdiń jumysyn qadaǵalaıdy.  Ortalyq kommýnıkasııalar qyzmetinde ótken brıfıngte Premer-Mınıstrdiń orynbasary, Indýstrııa jáne jańa tehnologııalar mınıstri Áset Isekeshev osylaı dedi. Bul týraly primeminister.kz habarlady. Áset Isekeshev Úkimet basshysynyń tóraǵalyǵymen ónerkásiptik damý boıynsha komıssııa qurylǵanyn aıta kele: «Bul organ ındýstrıalandyrý boıynsha barlyq jumysty úılestiredi. Indıkatorlar men tıimdiliktiń negizgi kórestkishteri engiziledi, aılyq, toqsandyq, jarty jyldyq jáne jyldyq negizde monıtorıng jasalady. Árıne, bul úılestirý komıssııasy barlyq memlekettik organdardyń, ulttyq holdıngterdiń, ákimdikterdiń jumysyn muqııat taldap, ol úshin barlyq qajet sharalardy qoldanady. Komıssııa esebi Úkimet Memleket basshysynyń aldynda esep bergende jylyna eki ret jarııalanady», – dedi. Sondaı-aq, ol memleket pen kásipkerlik arasynda jaýapkershilik júgin naqty bólý qarastyrylatyn jetkizdi.  Onyń aıtýynsha, memleket iri jobalardy, sonymen birge, memleket jol salý, sýbsıdııa berý syndy mindettemelerdi óz moınyna alady. Osylaısha, atqarýshy bılik óz mindettemelerine jaýapty bolsa, bıznes ónim men jobanyń sapasyna jaýapty bolmaq. Bul úshin arnaıy ınvestısııalyq kelisim túziledi. Memleket pen bıznes arasyndaǵy jaýapkershilikti bólýdiń sharttary boıynsha Ulttyq kásipkerler palatasy men ákimdikter aımaqtardaǵy jobalardy taldap, irikteıdi. Joldybaı Bazar. Derekkóz: primeminister.kz. Foto: primeminister.kz.