Respýblıkalyq «Kúı anasy» qorynyń jetekshisi Tólegen Qýanyshev sóz sóılep, Qazaqstannyń eńbek sińirgen qaıratkeri, jambyltanýshy Ýálıhan Qalıjan «Jambylǵa jańa kózqaras» atty baıandama jasady. Halyqaralyq jáne respýblıkalyq konkýrstardyń laýreaty Qurman Baıtas Jambyl atamyzdyń «Tógeıin jyrdy halqyma» degen tolǵaýyn oryndady.
Jármeńkeniń bir ereksheligi – dombyraǵa áýestigi bar ónerli balaǵa ata-anasy nemese qor ókilderiniń el aldynda dombyra syılaýy. Bul joly bes balaǵa úkili dombyra tabystaldy. Sondaı balalarǵa Qazaqstannyń eńbek sińirgen qaıratkeri, professor, kúıshi Orynbaı Dúısen bata berdi.
Oqýshylar Jambyl Jabaevtyń óleńderin qazaq, orys, aǵylshyn, fransýz tilderinde oqydy. Aqyn shyǵarmashylyǵy nasıhattalyp, basqa da kúıshilerdiń kúıleri oryndalǵan is-shara baıqaý túrinde ótti. Oqýshylar birinen biri ótip kúı tartty. Aldyńǵy orynnan kóringen balalarǵa úkili dombyra, kitaptar berildi.
Kesh barysynda sóz sóılegen «Kúı anasy» qorynyń jetekshisi Tólegen Qýanyshev is-sharaǵa uıytqy bolǵan qalalyq qoǵamdyq keńeske, Baıqońyr aýdanynyń ákimdigine, Qazaq Ulttyq óner ýnıversıtetine alǵys bildirdi.
